الماتىلىقتار ەسكى ۇيلەرىن اكىمدىكتىڭ سۋ جاڭا ۇيىنە ايىرباستاۋدان باس تارتتى
تۇرۋعا قاۋىپتى دەپ تانىلعان باسپانالاردىڭ باسىم بولىگى 70-80 جىل بۇرىن بوي كوتەرگەن عيماراتتار.
قازىر قالا باسشىلىعى ەسكى ءۇي يەلەرىمەن كەلىسسوزدەر جۇرگىزۋدە. كوپشىلىگى سۋ جاڭا باسپاناعا كوشەمىز دەپ قۋانىپ جۇرسە، ەندى ءبىر بولىگى ساپاسىز ۇيگە بارمايمىز دەپ تاپجىلماي وتىر دەپ حابارلايدى «ك ت ك» ارناسى.
«ۇيلەرىڭ سۇرىلەدى دەدى، سۋىمىز بەن جارىعىمىزدى كەسىپ تاستادى. ادامداردىڭ بارلىعى امالسىز ولاردىڭ بەرگەن ساپاسىز، سىلاعى ءتۇسىپ جاتقان ۇيىنە كوشتى. مەن نەگە وندا بارۋىم كەرەك. بەرگەن اقشالارى ەشتەڭەگە جەتپەيدى. سەكسەننەن اسقان اكەم بار. ءبىز سوڭىنا دەيىن بارامىز»، - دەيدى الماتى قالاسىنىڭ تۇرعىنى سۆەتلانا ۆوستريكوۆا.
قالا تۇرعىندارىنىڭ الاڭداۋى دا بەكەر ەمەس. الماتى اكىمىنىڭ ءوزى ەسكى ۇيلەردىڭ ورنىنا سالىنىپ جاتقان عيماراتتاردىڭ ساپاسى سىن كوتەرمەيتىنىن ايتقان. ال قۇرىلىسشىلار بارلىعىنا بىردەي جاعۋ مۇمكىن ەمەس دەپ وتىر. الايدا، اكىمدىك قىزمەتكەرلەرى «ەشكىمدى ماجبۇرلەمەيمىز. تەك ءتۇسىندىرۋ جۇمىستارىن جۇرگىزەمىز. كوشۋ-كوشپەۋ جاعىن وزدەرى شەشەدى»، - دەيدى.
«حالىقپەن جۇمىس ىستەۋ ءارقاشان قيىن عوي. بارىنە جاعۋ مۇمكىن ەمەس. شامامىز كەلگەنشە ءتۇسىندىرىپ جاتىرمىز. ولار تۇرىپ جاتقان ءۇي قاۋىپتى. قۇلاپ كەتسە وزدەرىنە جامان بولادى. سول ءۇشىن جاڭا ۇيلەرگە كوشىندەر دەپ ءتۇسىندىرىپ جاتىرمىز»، - دەيدى قۇرىلىس مەكەمەسىنىڭ ديرەكتورى اسقار ماپايەۆ.
الماتى قالاسى تۇرعىن ۇيلەردى جاڭعىرتۋ باعدارلاماسى بويىنشا 2012-2015-جىلدارى 48 ءۇي ءسۇىرىلىپ ورنىنا 51 ءۇي سالىنسا، 2024-جىلعا دەيىن تاعى مىڭنان استام ءۇي ءسۇىرىلىپ ورنىنا جاڭاسى سالىنباق.
