حازىرەت بەردىحان رەسپۋبليكالىق اقىندار ايتىسىندا توپ جاردى
ال پاۆلودار وبلىسىنىڭ نامىسىن كوتەرىپ جۇرگەن باياناۋىلدىق اسپانبەك شۇعاتايەۆ كەزەكتى جۇلدەسىنە قول جەتكىزدى.
شىعىس قازاقستان وبلىسى جارما اۋدانى قالباتاۋ اۋىلىندا وتكەن ءسوز دوداسى قازاقتىڭ كورنەكتى ايتىسكەر اقىنى، شەجىرەشى، جۋرناليست قاليحان التىنبايەۆتىڭ 90 جىلدىعىنا ارنالدى.
اسپانبەك ءبىرىنشى اينالىمدا استانالىق ەركەبۇلان قاينازاروۆپەن ايتىستى. ەكەۋى دە جوعارى ۇپاي جينادى. ەكىنشى اينالىمعا سەگىز اقىن جولداما الدى. پاۆلودارلىق اقىن ءوز كەزەگىندە الماتىلىق حازىرەت بەردىحانمەن جولىقتى.
قازىلار مەن حالىقتىڭ كوڭىلىنەن شىققان بۇل جۇپ باس جۇلدە مەن ءبىرىنشى ورىندى ءوزارا ءبولىستى، - دەدى «ايتىس اقىندارى مەن جىرشى - تەرمەشىلەردىڭ حالىقارالىق وداعى» رەسپۋبليكالىق قوعامدىق بىرلەستىگىنىڭ قىزمەتكەرى شۇعايىپ سەزىمحان.
التى ساعاتقا سوزىلعان الامان بايگەنىڭ باس جۇلدەسىن العان الماتىلىق حازىرەت بەردىحاننىڭ جۇلدەسى 1,5 ميلليون تەڭگەنى قۇرادى. ال، ءبىرىنشى ورىن العان اسپانبەك شۇعاتايەۆ ءبىر ميلليون تەڭگەنى قانجىعاسىنا بايلادى.
استانالىق اقىن سەرىكزات دۇيسەنعازين ەكىنشى ورىن مەن 800 مىڭ تەڭگەنى يەلەندى. ال، سەمەيلىك اسەم ەرەجە قىزى مەن استانالىق ەركەبۇلان قاينازارعا ءۇشىنشى ورىن مەن 350 مىڭ تەڭگەدەن بۇيىردى.
ايتا كەتەيىك، ءجۇرسىن ەرمان جۇرگىزگەن ايتىسقا پاۆلودار وبلىسىنان ەكى اقىن قاتىسقان بولاتىن. ونىڭ ءبىرى ازۋلى اسپانبەك شۇعاتايەۆ بولسا، ەكىنشىسى جاس ايتىسكەر اقىن - نۇرعانات قايرات. ايتىستىڭ قورتىندىسى بويىنشا نۇرعانات رينات زايىتوۆ، فارحاد مارات ۇلى، شۇعايىپ سەزىمحان، ايتبەك تۇرسىنبايەۆ، سەرىك قاليەۆ، ديدار قاميەۆ سىندى اقىندارمەن قاتار ىنتالاندىرۋ سىيلىعىمەن ماراپاتتالدى.
