كورەيا مەن تۇركيانىڭ تانىمال انشىلەرى الماتىعا كەلە جاتىر
قالالىق اكىمدىكتىڭ حابارلاۋىنشا، قالا كۇنىنە ارنالعان مەرەكەلىك باعدارلاما «مەدەۋ» مۇز ايدىنىندا 19-20 -تامىزدا وتەتىن «رۋحاني جاڭعىرۋ» اياسىندا ۇيىمداستىرىلىپ وتىرعان العاشقى حالىقارالىق «Star of Asia» مۋزىكا فەستيۆالىنەن باستالماق. ازيانىڭ ءتۇرلى باعىتتاعى تانىمال ورىنداۋشىلارى حيپ- حوپتان باستاپ، كلاسسيكالىق كومپوزيتسيالاردى ورىندايدى.
«وندا يندي- پوپ جانە روك بولماق، بۇل الماتىلىقتار ءۇشىن ناعىز مۋزىكالىق مەرەكە. فورماتى بويىنشا مۇلدەم جاڭا فەستيۆال، «ازيا داۋسى» مۋزىكالىق بايقاۋىنىڭ ءداستۇرلى جالعاسىنداي. «مەدەۋ» مۇز ايدىنىندا قىتاي، تۇركيا، جاپونيا، وڭتۇستىك كورەيا، ءۇندىستان جانە باسقا دا شەتەلدىڭ تانىمال انشىلەرى ءان شىرقايدى. ولاردىڭ اراسىندا وڭتۇستىك كورەيالىق «U- KISS» ك- رور توبى، ينديانىڭ ءانشىسى «Sanah Moidutty»، تۇرىك جۇلدىزى «Murat Boz» بار. ەكى كۇن ىشىندە شەتەلدىك ارتىستەرمەن بىرگە مۋزارت، قايرات نۇرتاس، ايقىن، ءالي وقاپوۆ جانە باسقا دا قازاقستاندىق انشىلەر ونەر كورسەتەدى»، دەلىنگەن حابارلامادا.
قالا تۇرعىندارى مەن قوناقتارى ءبىر اي ىشىندە «كوك- توبە - وپەرا» حالىقارالىق مۋزىكا فەستيۆالىنە بارىپ، اشىق اسپان استىندا «وركەسترلەر شەرۋىن»، «الما fest» الما فەستيۆالىن تاماشالاپ، «تويقازان 2017» اتتى قازاقستان حالىقتارىنىڭ ۇلتتىق اس مازىرلەرى فەستيۆالىنەن ءدام تاتىپ، «Gakku داۋسىنا» قاتىسىپ، «تۇلپار» ۇلتتىق كينوسىيلىعىن تاپسىرۋ شاراسىن تاماشالاي الادى.
سونداي- اق، «Almaty Sales Festival: Summer 2017» جەڭىلدىك فەستيۆالى اياسىندا قالانىڭ 100 دەن استام ساۋدا ورتالىعىندا ءبرەندتى تاۋارلار ارزان باعامەن ساتىلادى.
قالا كۇنى مەرەكەسىندە، 17 -قىركۇيەكتە «الماتى ارەنادا» «Muzzone» تەلەارناسىنىڭ VI ەۆرازيالىق «ەMA 2017» مۋزىكالىق سىيلىعىن تاپسىرۋ سالتاناتى وتەدى.
«كوڭىلدى مادەني باعدارلامالاردان وزگە الماتىلىقتار مەن قالا قوناقتارى سپورت جارىستارىن دا تاماشالاي الادى. ولاردىڭ ىشىندەگى باستىسى - قازاق كۇرەسى بويىنشا كوپتىڭ كوڭىلىنەن شىققان «الەم بارىسى» ءتۋرنيرى. 9 -قىركۇيەكتە «Alash Pride» پالۋاندارىنىڭ جارىسى وتەدى، مۇندا ەشكىمگە جەڭىلىس بەرمەگەن ارمان وسپانوۆ برازيليالىق تياگو تاۆارەسپەن كۇش سىناسادى. بيىل «تۋر الماتى» ۆەلوجارىسى ەكى كۇن، 28-29 -قىركۇيەكتە وتەدى ءارى حالىقارالىق كوپكۇندىك تۋرلاردىڭ ەڭ ماڭىزدىسى بولماق. «ەۋروسپورت» تەلەارناسى جارىستى تىكەلەي ترانسلياتسيالايدى.
اتاپ وتەرلىك جايت، «الماتى ارەنادا» جاقىن ايلار ىشىندە «ABBA platinum»، «ا'studio»، «گريبى» جانە باسقالارىنىڭ كونسەرتتەرى وتەدى.
رەسپۋبليكا سارايىندا تورەعالي ءتورالى، ۆاەنگا، نارگيز زاكيروۆا، پاۆەل ۆولي جانە باسقا قازاق جانە رەسەيلىك ەسترادا جۇلدىزدارىنىڭ كونتسەرتتەرى وتەدى.
بۇلاردان وزگە، بيىل م. لەرمونتوۆ اتىنداعى مەملەكەتتىك اكادەميالىق ورىس دراما تەاترى مەن ەلىمىزدىڭ ەڭ كونە الماتى زوولوگيالىق پاركى وزدەرىنىڭ 80 جىلدىق مەرەيلى مەرەكەلەرىن اتاپ وتپەك.
قالا كۇنىنە وراي جاياۋ جۇرگىنشىگە باسىمدىق بەرەتىن پانفيلوۆ، جىبەك جولى، گوگول، قابانباي باتىر كوشەلەرى مەن «استانا» الاڭىن قايتا جاساۋ جۇمىستارىن اياقتاۋ جوسپارلانعان جانە ءبىرقاتار الەۋمەتتىك نىساندار: اۋدان اكىمدىگى، ح ق ك و، سوت، پروكۋراتۋرا، ادىلەت باسقارماسى جانە باسقالارى ورنالاساتىن ناۋرىزباي اۋدانىنىڭ اكىمشىلىك ورتالىقتارى اشىلادى.
