قوستانايدا جانىبەك تارحاننىڭ ەسكەرتكىشى اشىلادى

«بۇگىن ءبىز استانانىڭ تورىندە جەرلەستەرىمىزدى جيناپ سۇحباتتاسىپ، پىكىر الماسۋ كەزدەسۋىن وتكىزۋدەمىز. وزدەرىڭىزگە بەلگىلى، اعىمداعى جىلدىڭ 11 -ساۋىرىندە ەلباسى نۇرسۇلتان نازاربايەۆ «بولاشاققا باعدار: رۋحاني جاڭعىرۋ» اتتى ماقالاسىن جاريالادى. سول ماقالا اياسىندا كوپتەگەن جوبالار قابىلداندى. سونىڭ ءبىرى «تۋعان جەر» دەپ اتالادى. وعان سايكەس ازاماتتار وزدەرىنىڭ تۋىپ- وسكەن ەلدى مەكەندەرىنە، ءبىلىم العان مەكتەپتەرىنە كومەك كورسەتەدى»، - دەپ اتاپ ءوتتى ارحيمەد مۇحامبەتوۆ.

وسى رەتتە ول وتكەن جىلى «كوركەيگەن قوستاناي» دەگەن اكسيا جاريالاعانىن، ونىڭ اياسىندا كوپتەگەن يگى ىستەردىڭ اتقارىلعاندىعىن ايتتى. ماسەلەن، سول جىلى ءوڭىردىڭ قالتالى ازاماتتارىنىڭ قولداۋىمەن ۇزاق جىلدارى بويى قۇرىلىسى اياقتالماي تۇرعان مەشىت سالىنىپ، جاماعاتتىڭ يگىلىگىنە تابىس ەتىلگەن.

«بيىل تارحان شاقشاق جانىبەككە ەسكەرتكىش ورناتىپ جاتىرمىز. جاقىن ارادا، تامىز ايىندا تاپسىرامىز. وعان ەلىمىزدەگى اتاقتى اكادەميك كەنجەعالي ساعاديەۆ باستاماشىلىق جاساپ، كوپتەگەن ازامات قارجى جينادى. ەندى ساۋلەتى دە، كەلبەتى دە قاسبەتى دە جاقسى ەسكەرتكىشتى تامىز ايىندا اشامىز»، - دەدى قوستاناي وبلىسىنىڭ اكىمى.

كەزدەسۋ بارىسىندا ارحيمەد مۇحامبەتوۆ 1998-2004 -جىلدارى قوستاناي ءوڭىرىن باسقارعان ءومىرزاق شوكەيەۆ پەن 2004-2012 -جىلداردا اكىم بولعان سەرگەي كۋلاگينگە، سونىمەن قاتار قارىمدى قالامگەر ءسابيت دوسانوۆقا وبلىستىڭ 80 جىلدىق مەرەيتويىنا ارنالعان مەدال تابىس ەتتى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى