الاكولدە دەمالۋشىلاردىڭ سانى ءبىر جارىم ەسەگە ارتتى
الاكولدىڭ جاعالاۋىن اباتتاندىرۋ جۇمىستارى باسەڭدەمەيدى. بۇل تۋرالى ءۇرجار اۋدانىنا جۇمىس ساپارى بارىسىندا وبلىس اكىمى دانيال احمەتوۆ ءمالىم ەتتى.
ايتا كەتەيىك، سوڭعى ۋاقىتتا ايماق باسشىسى جاعالاۋدىڭ اباتتاندىرىلۋى، تۋريستەرگە كورسەتىلەتىن قىزمەت ساپاسىنىڭ ارتۋى، كولگە دەيىنگى جولدىڭ جونگە كەلتىرىلۋى سياقتى ماسەلەلەردى تىكەلەي ءوز باقىلاۋىنا الىپ وتىر.
راس، ءبىر جىلعا جەتەر-جەتپەس ۋاقىت ىشىندە ايماق باسشىسى كول جاعاسىنا وسىمەن ءۇشىنشى رەت ات باسىن تىرەدى. العاش ساپارلارىندا مۇندا ورىن تەپكەن 150 گە جۋىق دەمالىس بازاسىنىڭ يەلەرىمەن كەزدەسىپ، ءبىرقاتارىنىڭ جۇمىسىن سىنعا العان ايماق باسشىسى بۇل جولى دا ءبىراز جايتقا كوڭىلى تولمايتىنىن جەتكىزدى.
«بيلىك الاكولدەگى دەمالىس بازالارىنىڭ يەلەرى الدىنداعى ۋادەسىن بۇلجىتپاي ورىنداپ كەلەدى. ەڭ باسىندا ايتىلعانداي، جاعالاۋدى اباتتاندىرۋعا 550 ميلليون، جول جوندەۋگە 1,5 ميلليارد تەڭگە بولدىك. بارلىقتارىڭىز كورىپ جۇرگەندەي، قازىر بۇل جەر ۇلكەن قۇرىلىس الاڭىنا اينالدى، كول جاعاسىندا جۇمىس قايناپ تۇر. الايدا، وسىنىڭ ءبارىن كورە تۇرا، كەيبىر كاسىپكەرلەر ءالى دە جايباسارلىعىن قويماي كەلەدى»، - دەدى وبلىس اكىمى دانيال احمەتوۆ كاسىپكەرلەردىڭ باسىن قوسقان كەزەكتى جيىندا.
ايماق باسشىسى ايتقانداي، كولدىڭ اينالاسى كۇن ساناپ جەرگىلىكتى تۇرعىندار مەن قوناقتاردىڭ كوز الدىندا ەرەكشە كەلبەتكە ەنىپ كەلەدى. بۇرىنعى ەسكى لاشىقتار مەن ۆاگونداردىڭ ورنىندا قازىر كول جاعالاۋىندا كەسكىنى كوز تارتار تاماشا قوناق ۇيلەر جايعاسقان. ورتالىق كوشەنىڭ ءبىرى كۇردەلى جوندەۋدەن ءوتىپ، ارباتقا اينالعان.
وقىس وقيعالاردىڭ الدىن الۋ ماقساتىندا سۋدا دا، جاعالاۋدا دا قاۋىپسىزدىك شارالارى كۇشەيتىلگەن. دەمالىس بازالارى قالاشىعىنداعى قوعامدىق تىنىشتىقتى بىرنەشە پوليتسيا پۋنكتى تاۋلىك بويى كۇزەتەدى. وسىعان قاراماستان، كاسىپكەرلەردىڭ ءبىرسىپىراسى ءالى دە وزىنە تيەسىلى تەلىمدە انىقتالعان زاڭ بۇزۋشىلىقتاردى جويماعان.
ءۇرجار اۋدانىنىڭ اكىمى سەرىك ءزاينۋلديننىڭ ايتۋىنشا، بۇگىندە جاعالاۋداعى 147 دەمالىس نىساننىڭ 113 ءى بارلىق تالاپقا ساي. تاعى 10 نىساندا انىقتالعان زاڭ بۇزۋشىلىقتار جويىلۋ ۇستىندە. ال قالعان 24 جەر يەسى كەمشىلىكتى جويماق تۇگىلى، ساۋساقتارىن دا قيمىلداتپاعان. ەندى مۇنداي جاۋاپسىز كاسىپكەرلەرگە ەشقانداي جەڭىلدىك جاسالمايدى. مۇنى جيىن بارىسىندا وبلىس اكىمى قاداپ ايتتى.
