شىمكەنتتە تىكۇشاق قاتىسقان توي سەرۋەنىندەگى كولىك جۇرگىزۋشىلەرى اكىمشىلىك جاۋاپقا تارتىلدى
بۇل تۋرالى وبلىستىق ىشكى ىستەر دەپارتامەنتىنىڭ باسپا ءسوز قىزمەتى مالىمدەدى، دەپ حابارلايدى قازاقپارات ح ا ا ءتىلشىسى.
الەۋمەتتىك جەلىلەرگە تاراعان بەينەجازبانى مۇقيات قاراپ شىققان جەرگىلىكتى پوليتسيا قىزمەتكەرلەرى توي سەرۋەنىندەگى ءۇش كولىكتىڭ جۇرگىزۋشىسى جول ەرەجەسىن بۇزعان دەگەن شەشىمگە كەلگەن.
اتاپ ايتقاندا «بەنتلي» مەن «تويوتا لەند-كرۋزەر» كولىكتەرىن تىزگىندەگەندەر اكىمشىلىك قۇقىق بۇزۋشىلىق كودەكسىنىڭ 614- بابى «كولىك قۇرالدارىنىڭ جۇرۋىنە كەدەرگى كەلتىرۋ» ارەكەتى بويىنشا جاۋاپقا تارتتى. وبلىستىق جەرگىلىكتى پوليتسيا قىزمەتىنىڭ باسشىلىعى سونداي-اق توي سەرۋەنىندە بولعان وزگە دە ازاماتتاردى اكىمشىلىك جاۋاپقا تارتامىز دەپ وتىر.
ال، تىكۇشاقتىڭ رەسپۋبليكالىق ماڭىزى بار جولدا كولىكتەرمەن بىرگە ءجۇرىپ، قانداي بيىكتىكتە ۇشقانى تۋرالى مالىمەتتەر قۇزىرلى ورگاندارعا جولدانعان.
ەستەرىڭىزگە سالا كەتەيىك، شىمكەنتتە توي كورتەجىمەن بىرگە ۇشقان تىكۇشاقتىڭ بەينەجازباسى بارلىق الەۋمەتتىك جەلىلەرگە تاراپ كەتكەن بولاتىن. تۇسىرىلىمدە توي كورتەجىمەن ىلەسىپ بارا جاتقان تىكۇشاق تومەن قاراي ءتۇسىپ، قايتا كوتەرىلگەن ەدى. كەيىننەن تىكۇشاقتى سۋرەتشى جىگىت ۇيلەنۋ تويىنداعى سەرۋەنگە جارتى ساعاتقا جالداپ، ول ءۇشىن 235 مىڭ تەڭگە تولەگەنى انىقتالعان.
