مۇراتحان توقماديدىڭ قىزى تۇرمەدەگى اكەسىنە ساعىنىش حاتىن جولدادى - فوتو
توقماديدى تۋعان كۇنىمەن قۇتتىقتاعان زەرە ءوزىنىڭ جۇرەكجاردى سوزدەرىن Instagram پاراقشاسىنا جاريالاعان.
«بۇگىن مەنىڭ ەڭ سۇيىكتى جانە ەڭ جاقىن ادامىم - اكەمنىڭ تۋعان كۇنى.
بۇگىن مەنىڭ اكەمدى كورمەگەنىمە، كۇنىنە 10 رەت «قالايسىڭ؟ نە ىستەپ جاتىرسىڭ؟ نە جاڭالىق؟» دەپ حابارلاساتىن اكەممەن سويلەسپەگەنىمە جانە الەمدەگى ەڭ ىستىق قۇشاقتى سەزىنبەگەنىمە 52 كۇن بولدى...»، - دەپ ءسوزىن باستاعان ول اكەسىنە دەگەن ساعىنىشىن جەتكىزدى.
«ءبىراق ءار ءتۇن سايىن اكەمدى تۇسىمدە كورەمىن: مەنىڭ وعان قاراي جۇگىرىپ بارا جاتقانىمدى، جۇرەگىم جارىلىپ كەتەردەي تولقيتىنىمدى، ارەڭ جۇگىرىپ جەتكەندە بار كۇشىممەن، ءتىپتى ودان دا قاتتىراق قىسىپ قۇشاقتايتىنىمدى جانە ەكەۋمىزدىڭ دە وكسىپ جىلايتىنىمىزدى كورەمىن.
ەكەۋمىزدىڭ كەزدەسۋىمىز ءار ءتۇن سايىن ءار جەردە، ءار ءتۇرلى جاعدايدا وتەدى، ءبىراق سەزىم بىرەۋ عانا.
ال كەيىن ويانا ساپ مۇنىڭ جاي عانا ءتۇس ەكەنىن، اكەمدى قۇشاقتاي المايتىنىمدى تۇسىنەمىن.
ءار كۇن سايىن مەن ونىڭ جاعدايىن ويلايمىن. بىلەمىن، ول ءبىزدى ساعىنىپ، مۇڭايىپ، قاتتى ۋايىمداپ ءجۇر. مىناداي ىستىقتى كوتەرۋ قيىنعا سوعىپ جاتقان شىعار... ول سالقىن جەردە ۇيىقتاپ ۇيرەنگەن. ونىڭ پايدالى ەكەنىن ۇنەمى ايتاتىن. ءبىز بەرىپ جىبەرەتىن تاماقتار ۇناپ جاتىر ما ەكەن... دەنساۋلىعى قالاي، جۇرەگى اۋىرماي ما؟»، - دەپ ۋايىمداعان زەرە كۇنى-ءتۇنى دۇعا تىلەپ جۇرگەنىن دە جازدى.
«مەن قاتتى ساعىنىپ ءجۇرمىن. ءبىراق ءوزىمدى كۇشتى بولۋعا كوندىرىپ جاتىرمىن، ول اكەمە كومەكتەسەدى. جانە ول ءتىرى بولعانى ءۇشىن جاراتقانعا راحمەت ايتامىن.
ءبىراق، قازىر بولماعانمەن ءبىر كۇنى مەن وعان ومىرىمدەگى جاڭالىقتاردى جەتكىزە الاتىن بولامىن. قاتتى-قاتتى قۇشاقتاي الامىن. سۇيىكتى قورعانىمنىڭ جانىندا ءوزىمدى باقىتتى قىز سەزىنە الامىن.
قۇدايعا جالبارىنىپ وسى كۇندى جاقىنداتۋىن سۇرايمىن. اكەمنىڭ دەنساۋلىعى جاقسى بولسىن دەپ تىلەيمىن. بارىنەن بۇرىن ادىلەتتىلىك ورناسا ەكەن دەيمىن.
اكە، تۋعان كۇنىڭىزبەن! مەن سەنى شەكسىز جاقسى كورەمىن❤️»، - دەپ اياقتادى ءسوزىن بيزنەسمەننىڭ قىزى.
