قازاقستاندا جازاسىن وتەپ جۇرگەندەرگە ارنالعان ەلەكتروندى بىلەزىكتەر جاسالادى - ق ر ءى ءى م

سەبەبى قىلمىستىق جازانى بارىنشا ىزگىلەندىرۋ شارالارى اتقارىلىپ كەلەدى. وسىنىڭ ناتيجەسىندە شارتتى تۇردە باس بوستاندىعىنان ايىرۋ شەشىمدەرى شىعارىلادى. ال ونداي ادامداردى پروباتسيا قىزمەتى باقىلايدى، دەپ حابارلايدى قازاقپارات ءتىلشىسى.

2009-جىلى قازاقستاننىڭ تۇرمەلەرىندە 49 مىڭ ادام جازاسىن وتەسە، بۇگىندە تۇتقىنداردىڭ سانى 29 مىڭعا دەيىن ازايدى. ال بوستاندىققا شىققان جانە شارتتى جازاعا كەسىلگەندەر مەملەكەتتىڭ ءجىتى باقىلاۋىندا بولادى.

اتالعان جۇمىستى قىلمىستىق اتقارۋ ينسپەكسيالارى نەگىزىندە قۇرىلعان پروباتسيا قىزمەتى اتقارادى.

«سوتتىڭ شەشىمىمەن بوستاندىقتا جازاسىن وتەپ جۇرگەندەردىڭ تاربيەسىن ءدال وسى پروباتسيا قىزمەتى باقىلايدى. جىل باسىنان بەرى وسى قىزمەت ارقىلى 43 مىڭ ادام ءوتتى. الداعى ۋاقىتتا ءبىز پروباتسيا قىزمەتى بويىنشا تەحنيكالىق قاداعالاۋ قۇرالدارىن، ياعني ەلەكتروندى بىلەزىكتەردى ەنگىزۋدى جوسپارلاپ وتىرمىز. ءبىز ەلەكتروندى بىلەزىكتەر ماسەلەسىن تالاي رەت تالقىلادىق. قازىرگى كەزدە ونداي قۇرالداردى ءوز ەلىمىزدە شىعارۋ تۋرالى شەشىم بار. بۇل باستامانى مەملەكەتتىك-جەكەشەلىك سەرىكتەستىك نەگىزىندە ىسكە اسىرۋ جوسپارلانعان»، - دەدى تۇرعىنبايەۆ بۇگىن ۇكىمەت ۇيىندە وتكەن باسپا ءسوز ءماسليحاتىندا.

ونىڭ ايتۋىنشا، ەلەكتروندى بىلەزىكتەر جۇيەسىن ەنگىزۋ ءۇشىن ءبىراز اقشا قاجەت بولادى. سەبەبى بىلەزىكتەردەن بولەك كومپيۋترلىك تەحنيكانى دا الۋعا تۋرا كەلەدى. سوسىن ءاربىر قالا مەن اۋداندا ارنايى كابينەتتى جاساقتاۋ قاجەت. ول ارقىلى جازالانعانداردى باقىلاپ وتىرۋعا بولادى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى