دارىگەرلەر كاسىبي قاتەلىكتەرى ءۇشىن سالىق تولەيدى
ياعني، ءار دارىگەر قورعا اشقا جيناپ، تۇسكەن قارجىعا ەمنەن دەنساۋلىعىنا كەرىسىنشە زيان كەلگەن نەمەسە ءولىم تىركەلگەن جاعدايلاردا وتەماقى قاراستىرىلادى. قىرۋار اقشانى ارنايى قۇرىلعان تاۋەلسىز قور باسقارماق. دەنساۋلىق ساقتاۋ مينيسترلىگى وسىلايشا دارىگەردى سوتقا سۇيرەۋدەن قۇتىلامىز دەيدى. وتاندىق مەديتسينانىڭ كەزەكتى رەفورماسىمەن ازامات الدوڭعاروۆ تانىستىرسىن.
- مەنىڭ ءومىر سۇرگىم كەلمەيدى. بارىنەن شارشادىم.
ليۋدميلا نەمچەنكونىڭ بۇلاي باز كەشۋىنىڭ سەبەبى - دارىگەردىڭ قاتەلىگى. ونىڭ بۇل كۇنىن قۋ تىرشىلىك دەمەسكە امال جوق. وپەراتسيا كەزىندە دارىگەر قۋىعىن كەسىپ العان. زەينەتكەردىڭ ەندى دارەتى تۇرمايدى. ال حيرۋرگ سول كۇيى جاۋاپقا تارتىلماعان. جورگەكسىز جۇرە الماي قالعان ايەل ەندى ادىلدىكتەن دە، ەمنەن دە كۇدەر ءۇزىپ وتىر.
«وتا جاسايتىن كەزدە حيرۋرگ ماس بولدى. جالعىز ول ەمەس، مەدبيكە، كومەكشىلەرىنەن دە ىشىمدىكتىڭ ءيىسى اڭقىپ تۇردى. سول كەزدە-اق كۇدىكتەنىپ، ءىشىم سەزىپ ەدى جاماندىقتى. ەندى قازىر، نە ىستەڭىز ونى ىستەڭىز، مەن كىم، ءسىز كىمسىز دەپ ەسىگىن «تارس» جابادى»، - دەيدى ليۋدميلا نەمچەنكو.
ال سامات ەسىمدى جىگىت كوز ەمدەۋ كلينيكاسىنا مينۋس 1,5 مەن كەلىپ، مينۋس 13 پەن كەتكەن. ورتالىقپەن داۋلاسقانىنا بيىل ءۇشىنشى جىل. ءبىراق ءىس سوتقا بارماپتى. سەبەبى دارىگەرلەر كەزىندە قولحات جازدىرىپ العان.
«قاتەلىكتى تۇسىنگەن كلينيكا، مەننەن ەشقانداي تالاپ- ارىزىم جوق دەگەن قولحات جازۋ شارتىن قويىپ، ناشارلاپ كەتكەن ءبىر كوزىمە وتا جاساۋدى ۇسىندى. ءبارى جاقسى بولاسىز دەگەن. ءبىراق وزگەرىس جوق. ولاردىڭ وسىلايشا شاعىم بەرۋ مەرزىمىن سوزعاندارىن ەندى ءتۇسىندىم»، - دەيدى سامات ىسقاقوۆ.
رەسمي ستاتيستيكاعا سەنسەك، ءبىر جىلدا اق حالاتتىلارعا 500 گە جۋىق شاعىم تۇسەدى. ءبىراق ونىڭ ساناۋلىسى عانا سوتقا جەتەدى. مىسالى 2016 -جىلى 15 دارىگەر جازاعا تارتىلسا، ونىڭ الدىڭعى جىلى ەكەۋى عانا. دارىگەر قاتەلىگىمەن تانىس ازاماتتار، ولاردىڭ كىناسىن دالەلدەۋ باسقا ءبىر دارىگەردىڭ قولىندا بولعاندىقتان، قيىننىڭ قيىنى دەيدى. قارعا- قارعانىڭ كوزىن شۇقىمايتىن جازىلماعان زاڭ. ماماندارىن سوتتان قورعاۋ ءۇشىن دەنساۋلىق ساقتاۋ مينيسترلىگى ەندى ارنايى قور قۇرماقشى.
«دارىگەردىڭ ماماندىعىنا بايلانىستى مىندەتتى ساقتاندىرۋ جارناسى 24 مىڭ مەن 40 مىڭ تەڭگە ارالىعىندا. 40 مىڭ حيرۋرگتاردان الىنادى، سەبەبى ولاردىڭ تاۋەكەلى ەڭ جوعارى. قاتارداعى مەدقىزمەتكەرلەر 5 مىڭنان اۋدارادى. ەگەر دە دارىگەرلەردىڭ قاتەلىگىنەن پاتسيەنتتىڭ دەنساۋلىعىنا زيان كەلسە 900 مىڭ مەن ميلليون 800 مىڭنىڭ ارالىعىندا، قايعىلى جاعداي بولسا 2 ميلليون تەڭگەدەن اسا وتەماقى تولەنەدى، - دەيدى ق ر دەنساۋلىق ساقتاۋ ۆيتسە- ءمينيسترى ءلاززات اقتايەۆا.
مينيسترلىك ەسەپكە 29 مىڭ دارىگەردى الىپ وتىر. وعان سايكەس قورعا ءبىر جىلدا ءبىر ميلليارد تەڭگەدەن ارتىق ءتۇسۋى ءتيىس. دارىگەردىڭ قاتەلىگىن تىيۋ مۇمكىن ەمەستىگىن تۇسىنگەن مينيسترلىك، وسىلاي ساقتانباقشى.
ارىپتەستەرىنىڭ قاتەلىگى ءۇشىن قوسىمشا مىندەتتى سالىق تولەۋ يدەياسىنا قاتىستى دارىگەرلەر ءالى پىكىر بىلدىرگەن جوق. ال ەمنەن زيان شەككەن ازاماتتار، جاڭا قور قۇر سالىق جينايتىن ۇيىم عانا بولادى دەپ كۇدىكپەن قارايدى.
