شىڭعىس حاننىڭ جولىمەن: كەلەسى جىلى تۇركى حالىقتارىنىڭ ۇلكەن قۇرىلتايى وتەدى
وعان ءاربىر ۇلت پەن ۇلىستىڭ اتىنان بەس ادام، بارلىعى 250 ادامداي كىرەدى. ال قۇرىلتايدىڭ وزىنە تۇركى حالىقتارىنىڭ 10 مىڭ وكىلى جينالادى دەگەن سەنىم بار، دەپ حابارلايدى قازاقپارات ءتىلشىسى.
كوميتەتتىڭ وكىلى يبراگيم حاليلدىڭ ايتۋىنشا، ول جەردە ناقتى ءتورت ماسەلە - تۇركى ءتىلىنىڭ امبەباپ سوزدىگىن قۇرۋ، ءبىرىڭعاي الفاۆيتتى قۇراستىرۋ، ورتاق تاريحتى زەرتتەۋ جانە تۇركى فيلوسوفياسىنىڭ كىتابىن دايارلاۋ تالقىلانادى.
«بىزدىڭشە، ءدال وسى ماڭىزدى ماسەلەلەر بويىنشا قۇرىلتايدى شاقىرۋعا بولادى. كەزىندە شىڭعىس حاندا وسى ىسپەتتى قۇرىلتايدى شاقىرىپ، تۇركى حالىقتارىن بىرىكتىرۋدى كوزدەدى. بۇرىن ول ماقسات شىڭعىس حاننىڭ الدىندا تۇرسا، قازىرگى كەزدە ءارقايسىسىمىز تۇركى حالىقتارىنىڭ بىرلىگىنە الاڭداۋىمىز قاجەت. بالكىم، ونداي باستاما بىرەۋگە ۇناماي قالۋى مۇمكىن. دەگەنمەن، وعان تۇركى حالىقتارىنىڭ بارلىق ۇلت پەن ۇلىستارىنىڭ وكىلدەرى قاتىسۋى ءتيىس. ءبىز اتا-بابالارىمىز سياقتى كيىز ۇيلەردى كوپتەپ تىگىپ، بۇرىنعى زامانداعى سياقتى ۇلكەن قۇرىلتايدى وتكىزۋدى كوزدەيمىز»، - دەيدى حاليل مىرزا.
ونىڭ ايتۋىنشا، ۇلكەن قۇرىلتايدى حان ءتاڭىرى ماڭايىندا (قازاقستان مەن قىرعىزستاننىڭ شەكاراسى) ۇيىمداستىرۋ جوسپارلانىپ وتىر. اعىمداعى جىلى 7- قاراشادا قازاقستاندا ۇيىمداستىرۋ كوميتەتىنىڭ وتىرىسى وتەدى. ال كەلەسى جىلى شامامەن 8- تامىزدا تۇركى حالىقتارىنىڭ ۇلكەن قۇرىلتايى ۇيىمداستىرىلادى دەگەن جوسپار بار.
قۇرىلتايدىڭ اقساقالدار كەڭەسىنە قازاقستاننىڭ اتىنان قوعام قايراتكەرلەرى ولجاس سۇلەيمەنوۆ پەن مىرزاتاي جولداسبەكوۆ ەندى.
«ءبىز بىرەۋدىڭ جەكە شارۋاسىنا، مەملەكەتتىڭ ىشكى ساياساتىنا ارالاسپايمىز. سوندىقتان قۇرىلتايدى ۇيىمداستىرۋعا ادام شاقىرعاندا ولاردىڭ وپپوزيتسيانىڭ قۇرامىنا كىرمەگەنىن، سوسىن مەملەكەتتىڭ ساياسي جۇمىسىنا بەلسەنە اتسالىسپاعانىن قالادىق. ءبىز ءاربىر مەملەكەتتىڭ جۇمىسىن جوعارى باعالايمىز. الايدا قۇرىلتاي - ول تازا قوعامدىق جۇمىستىڭ ناتيجەسى. ونىڭ ساياساتقا، ءيا بولماسا، گەوساياساتقا ەشبىر قاتىسى جوق»، - دەپ اتاپ كورسەتتى يبراگيم حاليل.
