قازاقستاندا جالاقىنىڭ ناقتى قۇنى تومەندەدى
بۇل تۋرالى Ranking.kz سايتى حابارلادى. ەستەرىڭىزگە سالا كەتسەك، اعىمداعى جىلدىڭ قاڭتار- ناۋرىز ايلارىندا قازاقستانداعى جالاقى قۇنىنىڭ جىلدىق قۇلدىراۋى 2 پايىزدى قۇراعان بولاتىن.
بۇل رەتتە قازاقستان تۇرعىندارىنىڭ ورتاشا ايلىق اتاۋلى جالاقىلارى 4,4 پايىزعا ءوستى. ءبىراق نەگىزگى تۇتىنۋ تاۋارلارى مەن قىزمەتتەر باعاسىنىڭ ءوسىمى جوعارى بولدى. سونىڭ سالدارىنان ەلدەگى ەڭبەك تابىسىنىڭ ناقتى قۇنى تومەن بولىپ وتىر.
جالدامالى جۇمىستىڭ ۇلتتىق نارىعى كولەمى جاعىنان قايتا قالپىنا كەلۋگە تىرىسۋدا. الايدا ءوسىم بارىنشا ءالسىز جۇرۋدە. اعىمداعى جىلدىڭ قاڭتار-ماۋسىمىندا قازاقستانداعى جالدامالى جۇمىسشىلاردىڭ ناقتى سانى 3,5 ميلليون ادامدى قۇرادى. بۇل ءبىر جىل بۇرىنعى سان دەڭگەيىنەن 1,5 پايىزعا جوعارى.
ايتا كەتەرلىگى، وتكەن جىلى ەڭبەك نارىعىنىڭ كولەمى كۇرت قىسقارىپ، ورتاشا جىلدىق دەڭگەيدەگى كورسەتكىشتىڭ كەمۋى 5,4 پايىز بولدى. سوڭعى 5 جىلدىڭ ىشىندە رەسپۋبليكاداعى جالدامالى جۇمىسشىلاردىڭ ەڭ كوپ سانى 2015-جىلى 3,6 ميلليون ادام بولىپ تىركەلدى.
2017-جىلدىڭ 2- توقسانىندا قازاقستاننىڭ نە ءبارى 2 وڭىرىندە عانا ناقتى جالاقى ءوسىمى تىركەلدى. ولار: اقتوبە (1,3 پايىز) جانە ماڭعىستاۋ (0,8) وبلىستارى. ءساۋىر-ماۋسىمدا جالاقىنىڭ ساتىپ الۋ قابىلەتىنىڭ بارىنشا قىسقارۋىن اتىراۋ تۇرعىندارى سەزىندى. بۇل وڭىردە ناقتى جالاقى 2016-جىلدىڭ 2- توقسانىمەن سالىستىرعاندا بىردەن 13,3 پايىزعا قۇلادى.
استانادا جۇمىسشىلاردىڭ جالاقىسى 0,1 پايىزعا كەمىدى. ال الماتىدا ناقتى جالاقىنىڭ قۇلدىراۋى جىلدىق ماندە 5,2 پايىزدى قۇرادى. اعىمداعى جىلى قازاقستاندا ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسى باستالادى.
باعدارلاما 2021-جىلعا دەيىن جۇمىس ىستەيدى. ول جۇزەگە اسىرىلعاننان كەيىن قازاقستانداعى جۇمىسسىزدىق دەڭگەيى 4,8 پايىزعا قىسقارادى دەپ كۇتىلۋدە.
اۋدارما: مارلان جيەمباي
