قازاقستاندىق باپكەر قانات يسلامنىڭ برەندون كۋككە قارسى مۇمكىندىكتەرىنە باعا بەردى
«برەندون كۋك وسال بوكسشى ەمەس، ونى جەتە باعالاماۋعا بولمايدى. قانات يسلامنىڭ وكىلدەرى كاسىبي رينگتە جەڭىلىپ كورمەگەن ناعىز مىقتى قارسىلاستى تاڭداعان ەكەن. بۇعان دەيىن كۋك ون سەگىز كەزدەسۋ وتكىزگەن جانە بارلىعىندا جەڭىسكە جەتكەن. ءسوزسىز، قۇرمەتكە لايىق سپورتشى. ونىڭ ۇستىندە، ايقاستىڭ قازاقستاندا ءوتۋى دە قانات يسلامعا ۇلكەن جاۋاپكەرشىلىك ارتىپ وتىر»، - دەيدى ەدىلوۆ.
«ءوز شارشى الاڭىڭدا جانكۇيەرلەردىڭ شەكسىز قولداۋىنا يە بولىپ قانا قويمايسىڭ، ەرەكشە قوبالجي تۇسەسىڭ، - دەپ جالعاستىردى ول. - دەگەنمەن، قانات يسلام تاجىريبەلى بوكسشى، وندا اۋەسقوي رينگتەگى بارلىق رەسمي تۋرنيرلەردىڭ ماراپاتتارى بار. كاسىبي رينگتەگى 24 كەزدەسۋىن دە جەڭىسپەن اياقتاعان. سوندىقتان، بۇل جولى قانات كەزەكتى رەت ءوز شەبەرلىگى مەن تەگەۋرىنىن كورسەتۋى ءتيىس».
سونىمەن بىرگە، باپكەر قانات يسلامنىڭ كاسىبي بوكسشى رەتىندەگى الداعى دامۋ جولىنا بولجام جاساپ كوردى.
«مەنىڭ ويىمشا، برەندون كۋكپەن بولعان جەكپە-جەكتەن كەيىن قاناتتىڭ الدىندا جاڭا مۇمكىندىكتەرگە جول اشىلادى. ارينە، كوپ نارسە ونىڭ پروموۋتەرلەرىنە بايلانىستى، قاناتتىڭ ءوزى كۇنى ەرتەڭ رينگكە شىعىپ كەتۋگە دايىن. قانات قازاقستانعا العاش كەلگەندە، مەنىڭ جەتەكشىلىگىممەن جاتتىققان ەدى، سول سەبەپتى ونىڭ بار مۇمكىندىكتەرى ماعان ايان. ونىڭ جوعارى كاسىبيلىگى مەن ىسكە بايىپپەن قاراۋى سۇيسىندىرەدى»، - دەپ اتاپ ءوتتى ەدىلوۆ.
باپكەردىڭ ايتۋىنشا، قانات يسلامنىڭ ومىرىندە تانىمال مەتسەنات، كاسىپكەر باۋىرجان وسپانوۆ ماڭىزدى ءرول اتقارعان.
مەتسەنات ءالى كۇنگە دەيىن سپورتشىعا قولداۋ ءبىلدىرىپ كەلەدى. «باۋىرجان وسپانوۆ قازاقستاندىق سپورتتىڭ، اسىرەسە جەكپە-جەكتىڭ ۇلكەن تابىنۋشىسى. وسپانوۆتىڭ رۋحاني جانە ماتەريالدىق قولداۋىنىڭ ارقاسىندا كوپتەگەن سپورتشىلار سپورتپەن اينالىسىپ، الەمدىك ارەنادا ەلىمىزدى تانىتۋعا ىنتالانا ءتۇستى. الماتى وبلىستىق بوكس جانە كۇرەس فەدەراتسياسىنىڭ پرەزيدەنتى رەتىندە باۋىرجان كەڭەسبەك ۇلى اتالعان سپورت تۇرلەرىن دامىتۋدا اۋقىمدى جۇمىستار اتقارىپ كەلەدى»، - دەيدى ت. ەدىلوۆ.
ەسكە سالا كەتسەك، ەدىلوۆتىڭ جەتەكشىلىگىمەن قازاقستاندىق بوكسشىلار 2000-جىلى سيدنەيدە وتكەن وليمپيادا ويىندارىنان ەكى التىن جانە ەكى كۇمىس جۇلدەلەر اكەلدى. 9- قىركۇيەك كۇنى «ەكسپو-2017» حالىقارالىق مامانداندىرىلعان كورمەسى اياسىندا كاسىبي بوكس كەشى وتەدى. قانات يسلامنان بولەك، بوكس كەشىندە جانقوش تۇراروۆ، جانىبەك ءالىمحان ۇلى، الي احمەدوۆ، مەيىرىم نۇرسۇلتانوۆ، رۋسلان مىرساتايەۆ، ديماش نيازوۆ، ايدوس ەربوسىن ۇلى جانە نۇرسۇلتان جانايبايەۆ رينگكە شىعادى.
اۆتور: ايجان سەرىكجان قىزى
