جەتىسۋلىقتار قازاق ونەرىنىڭ ابىزى اسانالى اشىموۆپەن جۇزدەستى
كەزدەسۋ «رۋحاني جاڭعىرۋ» باعدارلاماسىنا وراي ەلىمىزدىڭ ايتۋلى تۇلعالارىمەن، مادەنيەت جانە ونەر قايراتكەرلەرىمەن وتكىزىلەتىن «جەتىسۋداعى جۇزدەسۋ» جوباسىنىڭ اياسىندا ۇيىمداستىرىلدى، - دەپ حابارلايدى الماتى وبلىسى اكىمىنىڭ باسپا ءسوز قىزمەتى.
بيىل ونەر تارلانى اسانالى ءاشىموۆ 80 جاسقا تولدى. وسى مەرەيتوي اياسىندا وبلىس باسشىلىعى جەتىسۋلىقتارمەن كەزدەسۋگە ا. ءاشىموۆتى ارنايى شاقىرىپ، قۇرمەت كورسەتتى. الدىمەن 80 جىلدىق مەرەيتويعا ارناپ تۇسىرىلگەن «شاراينا - شىندىق شەبەرى» اتتى دەرەكتى فيلم كورسەتىلدى.
فيلمدە اكتەردىڭ ءومىرى مەن شىعارماشىلىعى قاتار ءورىلىپ بەرىلگەن. ءومىردىڭ سان قيلى بەلەستەرى، قيىندىقتارى مەن قىزىعى، ءۇمىت پەن سەنىم، قاجىر مەن قايرات - ءجۇرىپ وتكەن باسپالداقتارىنىڭ بارلىعى دا كورەرمەننىڭ كوز الدىنان تىزبەكتەلە ءوتتى.
مۇنان سوڭ كوپشىلىكتىڭ ىستىق ىقىلاس، قول شاپالاقتاۋىمەن ساحناعا كوتەرىلگەن ءاسانالى ءاشىموۆ جەتىسۋلىق قاۋىمعا ريزاشىلىعىن ءبىلدىرىپ، ءومىر تۋرالى، ونەر تۋرالى ىشكى تولعامدارىمەن ءبولىستى. ساحناعا شىققان اكتەردىڭ جارى باعدات، قىزى ساعينا مەن ۇلى ءاسانالى دە اتى اڭىزعا اينالعان تالانت يەسىنىڭ قامقور وتاعاسى، ارداقتى اكە رەتىندەگى بولمىسىنا ءسوز ارنادى.
وبلىس اكىمى اماندىق باتالوۆ ءوزىنىڭ الماتى قالاسىندا قۇرىلىس سالاسىندا ەڭبەك ەتىپ، «قازاق فيلم» كينوستۋدياسىن تۇرعىزعان كەزدەگى ءاسانالى اشىموۆپەن العاش كەزدەسكەن ساتتەرىنەن ەستەلىك ايتتى.
«ءسىزدى قازاق تەاتر جانە كينو ونەرىنىڭ ءمەترى دەپ ماقتانىشپەن ايتامىز. جەتىسۋ جۇرتشىلىعىنىڭ سىزگە دەگەن ىقىلاسى بولەك. قايتالانباس قولتاڭباڭىزدى باعامداۋ، ونەردەگى باسپالداقتارىڭىز، ومىرلىك تاجىريبەڭىز قوعام ءۇشىن، كەيىنگى جاس بۋىن ءۇشىن اسا قاجەت. سوندىقتان مۇنداي كەزدەسۋلەردىڭ ماڭىزى زور دەپ ەسەپتەيمىن. قازاق ونەرىنە قىزمەت ەتە بەرىڭىز. جاسىڭىز جۇزگە جەتسىن!» - دەدى ا. باتالوۆ.
مۇنان سوڭ ابىز اقساقالدىڭ يىعىنا شاپان جاۋىپ، سىي-سياپات كورسەتتى. كەزدەسۋ سوڭىندا جۇرتشىلىق اسانالى اقساقالمەن ەمىن-ەركىن تىلدەسىپ، قولتاڭبا الىپ، ەستەلىككە سۋرەتكە ءتۇستى.
