باياناۋىل اقىندارىنىڭ جىر جيناعى جارىققا شىقتى
باياناۋىل اۋداندىق «بايانتاۋ» گازەتىنىڭ ءتىلشىسى، اتالمىش جاڭا جيناقتىڭ قۇراستىرۋشىسى ەلامان حاسەن ۇلىنىڭ سوزىنشە، كىتاپقا 45 جاسقا دەيىنگى 21 اقىننىڭ ولەڭدەر توپتاماسى ەنگەن.
«بۇل كىتاپ «الاش» پارتياسىنىڭ 100 جىلدىق مەرەيتويىنا جانە ەل ەگەمەندىگىنىڭ 26 جىلدىعىنا ارنالىپ وتىر. سودان كەيىنگى تاعى ءبىر ماقساتىمىز - ەلباسىمىز ۇسىنعان «تۋعان جەر» باعدارلاماسىن جۇزەگە اسىرۋ.
قۇراستىرۋدى وسىدان التى اي بۇرىن قولعا العان ەدىك. سودان بەرى وڭىرىمىزدەگى 40 تان اسا اقىنجاندى ازاماتتار مەن ازاماتشالاردىڭ ولەڭ-جىرلارىن جيناپپىز. ءبىراق، كوركەمدىگى تومەن شىعارمالاردى جاريالاۋعا جۇرەكسىندىك، - دەيدى ەلامان حاسەن ۇلى.
كىتاپقا قازىرگى تاڭدا بايان وڭىرىندە تۇراتىنداردىڭ عانا ەمەس، وسىندا تۋىپ قىزمەت بابى بويىنشا الماتى، استانا، قاراعاندى، پاۆلودار قالالارىندا جۇرگەن شايىرلاردى دا توپتاستىرعان ەكەن.
ولەڭدەرى تاڭدالىپ الىنعان 21 اۆتوردىڭ قاتارىندا اسىعات تۇرعانبەك، جانارگۇل قادىروۆا، تاڭات احاتوۆ، باعدات دۇيسەنوۆ، اسپانبەك شۇعاتايەۆ سىندى ەلگە تانىلعان اقىندار بار.
ال، ەڭ كىشىسى - 16 جاسار راۋشان امانكەلدى قىزى. جىر جيناق اۋدان اكىمدىگىنىڭ قولداۋىمەن جانە اۋداندىق مادەنيەت جانە تىلدەردى دامىتۋ ءبولىمىنىڭ دەمەۋشىلىگىمەن شىقتى.
ەلاماننىڭ سوزىنشە، بۇل باياناۋىل اقىندار انتولوگياسى سەرياسىمەن جارىققا شىققان العاشقى جيناق. بولاشاقتا بۇقار جىراۋ، ءماشھۇر ءجۇسىپ، سۇلتانماحمۇتتاردان باستاپ، قازىرگى كۇنى ەل اراسىندا جۇرگەن تانىمال اقىنداردىڭ قالامىنان تۋعان شىعارمالارىنىڭ باسىن قوسىپ، تاعى ءبىر ۇلكەن ادەبي جيناق قۇراستىرۋدى جوسپارلاپ وتىر.
