قۇداي ساقتاي ما، ۇشقىش ساقتاي ما؟ اپاتتان امان قالعان ۇشاقتار - فوتو، ۆيدەو

121 جولاۋشى مەن ەكيپاج مۇشەسىنىڭ ءومىرىن ساقتاپ قالعان ۇشقىش الەكساندر اكوپوۆ سەكىلدى ءوز ءىسىنىڭ شەبەرلەرى عانا وسىلاي ەرلىك كورسەتە الادى. Baq.kz اقپارات اگەنتتىگىنىڭ ءتىلشىسى توتەنشە جاعداي كەزىندە ۇشقىش شەبەرلىگى مەن تاپقىرلىعىنىڭ ارقاسىندا ۇشاقتى امان- ەسەن قوندىرۋ وقيعالارىن ءتىزىپ شىققان ەدى.

اپاتتىق جاعدايدا سۋعا قونعان ۇشاقتار

ۇشقىشتار اپاتتان امان قالۋ ءۇشىن سۋعا قونۋدان مەيلىنشە قاشادى. سەبەبى، جەرمەن سالىستىرعاندا ۇشاقتى سۋ بەتىنە قوندىرۋ الدەقايدا قيىن. ءساتتى قونسا دا ۇشاق سۋدا جارتى ساعات قانا تۇرا الادى، ودان كەيىن تۇگەلىمەن باتىپ كەتەدى. ازاماتتىق اۆياتسيادا ەڭ العاش مۇنداي تاۋەكەلگە 1956 -جىلى 377 Stratocruiser لاينەرىنىڭ ۇشقىشى بارعان بولاتىن. 15 -قازان كۇنى 24 جولاۋشىسى مەن 7 ەكيپاج مۇشەسى بار Boeing لاينەرى گونولۋلۋدان سان- فرانسيسكوعا باعىت العان. تىنىق مۇحيتى ۇستىنەن ۇشىپ بارا جاتقان ۇشاق قوزعالتقىشىنىڭ ەكەۋى ىستەن شىققان سوڭ سۋ بەتىنە قونۋعا ءماجبۇر بولدى. ۇشاق سۋعا باتىپ كەتكەنگە دەيىن جولاۋشىلار مەن ەكيپاج مۇشەلەرى قۇتقارىلىپ، ۇشقىشتىڭ باتىل شەشىمى بورتتى تۇگەل امان الىپ قالدى.

ءدال وسىنداي وقيعا التى جىلدان سوڭ 1962 -جىلى 22 -قازاندا تىركەلدى. بۇل جولى تاكومادان انكوريدجگە ۇشقان امەريكالىق DC-7C جولاۋشىلار ۇشاعى قوزعالتقىشتان شىققان اقاۋ سالدارىنان اشىق مۇحيتقا قونۋعا ءماجبۇر بولدى. قوزعالتقىشتىڭ جانىپ بارا جاتقانىن كورگەن ۇشقىش حانسەننىڭ تاباندىلىعى 102 ادامنىڭ ءومىرىن ساقتاپ قالدى. ەكيپاج مۇشەلەرى سۋعا قونعان سوڭ ءۇش مينۋتتا 95 جولاۋشىنىڭ ءبارىن سىرتقا شىعارىپ ۇلگەردى. بورتتاعىلاردىڭ امان قالۋىنا ۇشقىشتاردىڭ كاسىبيلىگىنەن بولەك، قولايلى اۋا رايى مەن سۋ دەڭگەيىنىڭ ءبىرقالىپتىلىعى دا اسەر ەتكەن.

اڭىزعا اينالعان «گۋدزون عاجابى»

2009 -جىلى 15 -قاڭتاردا نيۋ- يوركتەن سيەتلگە قاراي باعىت العان Airbus A320 جولاۋشىلار ۇشاعى كوككە كوتەرىلگەن سوڭ 1,5 مينۋتقا جەتپەي اپاتتىق جاعدايعا تاپ بولدى. 900 مەترگە كوتەرىلگەن كەزدە ەكيپاج مۇشەلەرى ءبىر توپ جابايى ۇيرەكتىڭ جاقىنداپ كەلە جاتقانىن كورگەن. ۇشاققا سوعىلعان قۇستاردىڭ كەسىرىنەن ەكى قوزعالتقىش بىردەي جانىپ، تىعىرىقتان شىعۋ ءۇشىن ەكيپاج كومانديرى چەسسلي ساللەنبەرگەر 150 جولاۋشىسى بار لاينەردى نيۋ- يوركتەگى گۋدزون وزەنىنىڭ ۇستىنە قوندىرۋعا بەل بايلادى. اۋەدە بار- جوعى 7 مينۋت قانا ۇشقان لاينەردە بىرنەشە ادام جاراقات العانىمەن، كىسى شىعىنى بولمادى.

 وسى ۋاقىتقا دەيىن ازاماتتىق اۆياتسيادا 11 رەت جولاۋشىلار ۇشاعىن سۋعا قوندىرۋ وقيعاسى ورىن العان. ال Airbus A320 جولاۋشىلار لاينەرى ادام شىعىنىنسىز سۋعا قونعان ءتورتىنشى ۇشاق بولىپ تاريحتا قالدى. ءتىپتى، گولليۆۋد وسى وقيعا جەلىسىمەن «گۋدزونداعى تاڭعاجايىپ» اتتى فيلم ءتۇسىرىپ، 2016 -جىلى كورەرمەنگە جول تارتقان بولاتىن.

جاس ۇشقىشتىڭ شەبەرلىگى

2010 -جىلى 5 ساۋىردە اۆستراليادا جاس ۇشقىش كولىك تراسساسىنا قونۋعا ءماجبۇر بولدى. جەڭىل موتورلى ۇشاقتى باسقارعان 18 جاستاعى ۇشقىش قوزعالتقىشتىڭ ىستەن شىققانىن ءبىلىپ، دەر كەزىندە تراسسانىڭ بوس جولاعىنا قونعان. كورشى جولاقتا كەتىپ بارا جاتقان ۇشاقتى كورگەن كولىك جۇرگىزۋشىلەرى ءوز كوزدەرىنە وزدەرى سەنبەي ابدىراپ قالادى. وقيعا كۋاگەرلەرى ەشكىمگە زاقىم كەلتىرمەگەن ۇشقىشتىڭ تاپقىرلىعى مەن شەبەرلىگىنە تاڭعالىستى.

«بۇل جىگىت ناعىز شەبەر، قابىلەتتى ۇشقىش ەكەن. موتورىندا اقاۋ بولعان سياقتى. الدىمەن جول بەرۋىن ءوتىنىپ جۇرگىزۋشىلەرگە دابىل قاقتى. وقيعا ورنىنا جەتكەن پوليتسەيلەر دە جاس ۇشقىشتىڭ ەرلىگىنە قول سوعىپ، تاڭدانىس ءبىلدىردى» ، - دەپ وقيعا كۋاگەرى نيك پروبەرت پىكىر بىلدىرگەن بولاتىن.

ورمانعا قونعان ۇشاق

 2010 -جىلى 7 -قىركۇيەك كۇنى رەسەيدە 72 جولاۋشىسى مەن 9 ەكيپاج مۇشەسى بار تۋ-154 لاينەرى اپاتتىق جاعدايعا تاپ بولدى. اۋە كەمەسى 10600 مەتر بيىكتىككە كوتەرىلگەندە ەلەكتر قۋاتى جوعالىپ، ۇشاقتىڭ ناۆيگاتسيالىق جۇيەسى، جاعارمايدى اۋىستىرىپ قۇيۋ سورعىسى، بايلانىس قۇرالدارى ىستەن شىققان. ۇشاقتىڭ نەگىزگى باگىندە 30 مينۋتقا عانا جەتەتىن جاعارماي قالعانىن بىلگەن سوڭ ەكيپاج مۇشەلەرى جاقىن ماڭايدان قوناتىن جەر ىزدەگەن. ولار تىكۇشاق الاڭى رەتىندە پايدالانىلعان، ءبىراق كەيىننەن قاراۋسىز قالعان «يجما» اۋەجايىنىڭ اەرودرومىنا قونۋدى ءجون تاپقان. ءبىر قىزىعى، تىكۇشاق الاڭىنىڭ باستىعى سەرگەي سوتنيكوۆ قاراۋسىز قالعان اەرودرومنىڭ ۇشىپ- قونۋ جولاعىن اعاشتاردان تازارتىپ، كۇتىپ ۇستاعان. جەرگىلىكتى ادامداردىڭ ايتۋىنشا، «يجماعا» 20 جىلدان بەرى ەشقانداي اۋە كەمەسى قونباعان. ناتيجەسىندە لاينەر ورمان اراسىنداعى جولاققا ءساتتى قونىپ، 91 ادامنىڭ ءومىرى امان قالدى. ءوز مىندەتىنە كىرمەسە دە ۇشىپ- قوناتىن جولدى قاراۋدا ۇستاعان سەرگەي سوتنيكوۆ Ⅱدارەجەلى «وتان الدىنداعى قىزمەتى ءۇشىن» وردەنىمەن، لاينەر كومانديرى ەۆگەني نوۆوسەلوۆ پەن ەكىنشى ۇشقىش اندرەي لامانوۆ «رەسەي قاھارمانى» اتاعىمەن ماراپاتتالدى.

ۇشاق كولىكتەر جۇرەتىن جولعا قوندى

2013 -جىلدىڭ 4 قازانىندا سان- حوسەدە Bellanca 7ECA جەڭىل موتورلى ۇشاعىن باسقارعان ۇشقىش دەر كەزىندە قوزعالتقىشتاعى اقاۋدى انىقتاعان. سودان سوڭ ۇشقىش اۆياديسپەتچەرگە اپاتتى جاعدايدى حابارلاپ، جاقىن ماڭايداعى تاس جولدىڭ بىرىنە قونۋعا رۇقسات سۇرايدى. اۆياديسپەتچەر دەرەۋ جول پوليتسياسىمەن بايلانىسىپ، كەپتەلىس بولىپ جاتقان ماگيسترالدى كولىكتەن بوساتۋىن تاپسىرادى. وسىلايشا، ۇشقىشتىڭ تاپقىرلىعى مەن تاس جولدى جىلدام بوساتقان كولىك جۇرگىزۋشىلەرىنىڭ ارقاسىندا ۇشاق تراسساعا امان- ەسەن قوندى.

 ۇشاق باسقارعان جولاۋشى

2013 -جىلى جەلتوقساندا ازاماتتىق اۆياتسيادا ەرەكشە وقيعا بولدى. دە- مويننان دەنۆەرگە باعىت العان Boeing 737 ۇشاعىنىڭ ەكىنشى ۇشقىشى جۇرەك تالماسىنا ۇشىراپ، ەكيپاجداعى ورنى بوس قالعان. كۇتپەگەن جاعدايدان سوڭ ستيۋارد جولاۋشىلاردان «ارالارىڭىزدا دارىگەر بار ما؟» دەپ سۇرايدى. سالدەن سوڭ بورتتاعىلار ۇشاق باسقارا الاتىنداردىڭ بار- جوعىن سۇراعان ستيۋارد داۋىسىن ەستيدى. جولاۋشىلاردىڭ باقىتىنا وراي، بورتتا تاجىريبەلى ۇشقىش، كاپيتان مارك گونگول بولىپ، ەكيپاجعا بارىپ جايعاسادى. ول ءبىرىنشى ۇشقىشپەن بىرگە ۇشاقتى ەش قيىندىقسىز باسقارىپ، جولاۋشىلاردى امان الىپ قالدى.

BekAir- دىڭ باتىل ۇشقىشى

قيىندىققا تاپ بولعان ۇشاقتاردىڭ امان قونۋ وقيعالارى وتاندىق اۆياتسيادا سيرەك كەزدەسەدى. سونىڭ ءبىرى - Bek Air اۋە كومپانياسىنا تيەسىلى Fokker-100 دىڭ شاسسيسىز قونۋى. 2016 -جىلى 27 -ناۋرىز كۇنى قىزىلوردا- استانا باعىتىنداعى Bek Air ۇشاعى الدىڭعى شاسسيلەرى اشىلماي قالسا دا ءساتىن سالىپ امان قونعان بولاتىن. وسى وقيعادان سوڭ 121 ادامنىڭ ءومىرىن ساقتاپ قالعان ۇشقىش دميتريي رودين «حالىق قاھارمانى» اتاعىنا يە بولدى. ايتا كەتەرلىگى، اۆياتسيا تاريحىندا ۇشاقتى شاسسيسىز قوندىرىپ، جولاۋشىلاردى امان ساقتاپ قالۋ وقيعالارى وتە ساناۋلى.

دايىنداعان نازەركە ابيبۋللا

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى