حالىقارالىق بايقاۋدا «قازاق ەلى» انيماتسيالىق فيلمى ۇزدىك اتاندى
اتالعان بايقاۋ كانن، بەرلين، ۆەنەتسيا سىندى فەستيۆالدەرمەن تەڭ دارەجەدە پروديۋسەرلىك قاۋىمداستىقتىڭ حالىقارالىق وداعىندا (FIAPF) تىركەلگەن، ورتا ازياداعى وراسان زور كينوفورۋم بولىپ تابىلادى.
سالتاناتتى شارادا «قازاق ەلى» انيماتسيالىق فيلمىنىڭ رەجيسسەرى، وبلىستىق مادەنيەت باسقارماسىنىڭ «وڭتۇستىك فيلم» ك م م- ءنىڭ ديرەكتورى، «ساق» كينوستۋدياسىنىڭ بەلگىلى سسەناريستى، رەجيسسەر باتىرحان داۋرەنبەكوۆكە كينوفەستيۆالگە بەلسەنە قاتىسىپ، بالالار كينوسىنىڭ دامۋىنا ىقپال جاساعانى ءۇشىن ق ر تۇڭعىش پرەزيدەنتى - ەلباسى قورىنىڭ ارنايى جۇلدەسى مەن «العىس حاتى» سالتاناتتى تۇردە تاپسىرىلدى، دەپ حابارلايدى و ق و اكىمىنىڭ باسپا ءسوز قىزمەتى.
فەستيۆال باعدارلاماسىندا قازاقستان، فرانسيا، نيدەرلاند، قىتاي، اۋعانستان، يران، تۋنيس، پەرۋ، ءۇندىستان، مەكسيكا، يسپانيا، يتاليا، دانيا، گرۋزيا جانە ت. ب. ەلدەردىڭ شىعارماشىلىق توپتارىنىڭ جۇمىستارى كورسەتىلدى. سونىمەن قاتار، «بەس قۇرلىق» بالالار كينوفەستيۆالىنىڭ اشىلۋ سالتاناتىنا «وسكار»، «التىن گلوبۋس» سىندى كينو ونەرىندەگى بەدەلدى سىيلىقتاردىڭ يەگەرى، امەريكالىق اكتەر، پروديۋسەر، كينورەجيسسەر نيكولاس كەيدج قاتىستى.
