مىرزاعالي ايتجانوۆ الەم بىرىنشىلىگىنە باراتىن بوكسشىلاردى اتادى - فوتو، كەسكىن

بۇل تۋرالى بوكستان قازاقستان ۇلتتىق قۇراماسىنىڭ باس باپكەرى مىرزاعالي ايتجانوۆ قازاقپارات تىلشىسىنە بەرگەن سۇحباتىندا ءمالىم ەتتى.

- مىرزاعال قۇلان ۇلى، گامبۋرگتە وتەتىن الەم چەمپيوناتى جاقىنداپ كەلەدى. بوكسشىلاردىڭ دايىندىعى قالاي؟

- جامان ەمەس. قازىر بوكسشىلار الاتاۋ بوكتەرىندە قىزۋ دايىندىق ۇستىندە. نەگىزىنەن جوسپارعا العان بارلىق جاتتىعۋىمىزدى اياقتاپ قالدىق. تاۋعا جۇگىرۋ، تاس لاقتىرۋ سياقتى كۇش جينايتىن نەگىزگى وقۋ-جاتتىعۋ ءوز مارەسىنە جەتىپ قالدى.

- الەم بىرىنشىلىگىنە تاس-ءتۇيىن دايىنبىز دەۋگە بولادى عوي...

- ارينە، دايىنبىز. تامىزدىڭ ەكىسى كۇنى تاۋدان تۇسەمىز. وسى اپتا بوكسشىلار ءۇشىن ەڭ اۋىر اپتا بولىپ سانالادى. بارلىق كۇش-جىگەرىن سارقىپ، دايىندىقتىڭ ەڭ قيىن ساتتەرىن ورىنداپ جاتىر.

- بۇيىرسا الەم بىرىنشىلىگىندە كىمدەرگە ءۇمىت ارتىپ وتىرسىز؟

- ون سالماق بويىنشا 10 بوكسشىمدى الىپ بارامىن. 49 كەلىدە ەرجان جومارت، 52 كەلىدە ازامات يساقۇلوۆ، 56 كەلىدە قايرات ەراليەۆ، 60 كەلىدە ادىلەت قۇرمەتوۆ، 64 كەلىدە بەكداۋلەت يبراگيموۆ، 69 كەلىدە ابىلايحان ءجۇسىپوۆ، 75 كەلىدە ءابىلحان امانقۇلوۆ، 81 كەلىدە ەرىك ءالجانوۆ، 91 كەلىدە ۆاسيلي لەۆيت جانە اسا اۋىر سالماقتا قامشىبەك قوڭقابايەۆتان ءۇمىت كۇتىپ وتىرمىن.

- جوسپار بويىنشا قانشا مەدال الۋدى كوزدەپ وتىرسىزدار؟

- كەمى ءتورت مەدال. بۇل قازىرگى جوسپارىمىز. ەگەر بىرىنشىلىك ءبىز ويلاعانداي ءادىل وتسە، تورەشىلەر كوز-قىستى، بارماق باستى ارەكەتتەرگە بارماسا، ودان دا كوپ مەدال الۋعا تىرىسامىز.

- اڭگىمەڭىزگە راحمەت! ساتتىلىك جولداس بولسىن...

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى