باتىس قازاقستاننىڭ قازتالوۆ اۋدانىنداعى مۋزەي قازاق جىلقىسىنىڭ تاريحىنان سىر شەرتەدى
ماقسات - كەيىنگى جاس بۋىننىڭ قامبار اتا تۇلىگىنە دەگەن قىزىعۋشىلىعىن وياتۋ. ەل اراسىندا ساقتالعان بىرەگەي ات ابزەلدەرىن مۇراجاي قورىنا جيناۋ. ءبىر قىزىعى، وسىنداي يگىلىكتى ءىس اۋىل تۇرعىندارىنىڭ كومەگىمەن ۇيىمداستىرىلعان ەكەن.
جىلقىنى «مالدىڭ پاتشاسى» دەپ قاستەرلەگەن حالقىمىز ات ابزەلدەرىنە دە ايرىقشا ءمان بەرگەن. مۋزەيدەن سونىڭ ەڭ كونە ۇلگىلەرىن كەزدەستىرۋگە بولادى.
ولاردىڭ اراسىندا ەر-تۇرمان، ومىلدىرىك پەن قۇيىسقان، ۇزەڭگى، ايىل، نوقتا، جۇگەن سياقتى ابزەلدەر بار.
كەيبىرىنىڭ تاريحى تىپتەن قىزىق. «1941-1945 -جىلدارى ەكىنشىدۇنيەجۇزىلىك سوعىسقا بارعان اتالارىمىز سول جەردەگى سوعىسقا قاتىسقان جىلقىلاردىڭ ابزەلدەرىن وسىندا اكەلىپ ۇرپاقتان ۇرپاققا بەرىپ، ولاردىڭ ۇرپاقتارى وسىندا اكەلىپ تاپسىردى. سول ءبىر قۇندى زاتتار وسى مۇراجايدا تۇر. جىلقىنىڭ تاريحى جونىندە، جىلقىنىڭ قازاقستاندا تابىلعان جەرلەرى بارلىعى وسىندا جازىلعان»، - دەيدى قوشانكول اۋىلىنىڭ تۇرعىنى ايان كاريموللين.
قوشانكولدىكتەر مۋزەي اشۋمەن شەكتەلمەپتى. اۋىل ماڭىنداعى تابيعاتى اسەم جەردە جازعى لاگەر جۇمىس ىستەيدى. مۇندا تاجىريبەلى اتبەگىلەر جەتكىنشەكتەرگە جىلقىنى باپتاۋدىڭ قىر-سىرىن ۇيرەتەدى.
«بۇل لاگەردىڭ ەڭ باستى قىزىعى اتقا ءمىنۋ. جىل سايىن بولىپ تۇرادى. اتقا ءمىنۋ ادام دەنساۋلىعىنا پايدالى»، - دەيدى قاراوبا اۋىلىنىڭ تۇرعىنى تۇرسىنبەك قىدىرعاليەۆ، مۋزەيدە تالاي الامان بايگەدە ولجا سالعان جۇيرىكتەر تۋرالى نەبىر قىزىقتى دەرەكتەر جيناقتالعان.
جىلقى مالىنىڭ سيپاتى مەن ونى كۇتىپ باپتاۋ تۋرالى مالىمەتتەر دە مول. «ماقساتىمىز كەلەشەكتە مۇراجايدى جاڭا جادىگەرلەرمەن تولىقتىرىپ، تۋريستەر تاماشالايتىن ورىنعا اينالدىرۋ»، - دەيدى اۋىل تۇرعىندارى.
