قىتايدا قولامەن قاپتالعان ەجەلگى زامانعى پاتشا كۇيمەسى تابىلدى

مۇنىمەن چجەن پاتشالىعىنىڭ بيلەۋشىسى جۇرگەن. قازبا جۇمىستارى قازىرگى حىنان پروۆينتسياسى اۋماعىندا (ورتالىق قىتاي)، سينچجەن قالاسىنا جاقىن ماڭدا بەس ايدان بەرى جۇرگىزىلۋدە. كۇيمە عالىمداردى ءوزىنىڭ ۇلكەندىگىمەن جانە ءسان- سالتاناتىمەن تاڭداندىردى.

 اربانىڭ ۇزىندىعى 2,56 مەتر، ەنى 1,66 مەتر، كۇننەن جانە جاڭبىردان قورعايتىن ارنايى شاتىرى دا بار. سونداي- اق قولامەن قاپتالىپ، سۇيەكتەردەن ويىپ ورنەكتەر جاسالعان. ءار دوڭعالاعىندا 62 شاباقتان بار. بۇل ونىمەن جۇرەتىن ادامنىڭ الەۋمەتتىك مارتەبەسى جوعارى ەكەندىگىن كورسەتەدى. ەكى اياقتى كۇيمە بيلەۋشى چجەننىڭ مازارىنان تابىلدى جانە ونىڭ و دۇنيەدەگى ساپارىنا ارنالعان.

«بۇل ءبىز تاپقان كۇيمەلەردىڭ ىشىندەگى ەڭ ۇلكەنى جانە ەڭ ءساندىسى»، - دەيدى حىنان ينستيتۋتى ارحەولوگتار توبىنىڭ جەتەكشىسى ما تسزيۋنتساي. ونىڭ ايتۋىنشا، ەەجەلگى كولىك قۇرالى بارىنشا قولايلى. مۇندا تۇرۋعا دا، وتىرۋعا دا، ءتىپتى جاتۋعا دا بولادى. سونداي- اق قازبا بارىسىندا تاعى ءتورت كۇيمە تابىلعان. ءبارى سول كەزەڭدەگى چجەن استاناسىنا، باتىسقا قاراي ءجۇرىپ بارا جاتقانداي اسەر قالدىرادى. قازىرگى ءجۇرىپ جاتقان قازبا جۇمىستارىن قىركۇيەككە دەيىن اياقتاۋ جوسپارلانىپ وتىر. قورىمدا جالپى ءۇش مىڭنان استام قابىر بار، دەپ جازادى شينحۋا.

 اۆتور: ەرلان قوجاكەلديەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى