نۇر وتان پارتياسى ءبىلىم سالاسىنىڭ «ۇزدىك» جەمقورلارىن تانىستىردى
وسى جولى ءبىلىم سالاسىنداعى جەمقورلىق ماسەلەسى تالقىعا سالىندى. ايتا كەتكەن ءجون، پارتيا ول جۇمىستى ق ر مەملەكەتتىق قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىمەن بىرگە اتقارىپ كەلەدى، دەپ حابارلايدى قازاقپارات ءتىلشىسى.
اگەنتتىك ءتوراعاسىنىڭ ورىنباسارى اليك شپەكبايەۆتىڭ ايتۋىنشا، بۇگىندە ءبىلىم سالاسىنداعى جەمقورلىق ارەكەتتەرىنىڭ سانى ءوسىپ كەلەدى. جەمقورلاردىڭ العان پاراسى دا از ەمەس. "ماسەلەن، بۇرىنعى ۆيتسە- مينيستر سايات شاياحمەتوۆتىڭ قاتىسۋىمەن ىسكە اسقان جەمقورلىق ارەكەتى ۇلكەن قوعامدىق رەزونانس تۋعىزدى. اتالعان ءىس بويىنشا مەملەكەتكە كەلگەن شىعىن 1,5 ميلليارد تەڭگەنى قۇرادى.
اقتوبە وبلىسىندا ءبىلىم سالاسىنداعى باقىلاۋ دەپارتامەنتىنىڭ باسشىسى اكىمگەرەي كوشەربايەۆ ءۇش جىلعا سوتتالدى. ول اتتەستاتسيانىڭ وڭ شەشىمى ءۇشىن پەداگوگتاردان اقشا جيناعان. ءسويتىپ وبلىستاعى ءتورت مەكتەپتەن 1,5 ميلليون تەڭگە پارا الدى. پاۆلودار وبلىسىندا ءبىرىڭعاي ۇلتتىق تەستىلەۋدى ءساتتى تاپسىرعانى ءۇشىن اقشا جيناۋ فاكتىسى دە انىقتالدى. ونى ەكىباستۇز قالالىق ءبىلىم بەرۋ ءبولىمىنىڭ باسشىسى نۇرجامال ماقۇموۆا ۇيىمداستىرعان. ول قالاداعى بارلىق 45 مەكتەپ ديرەكتورىنان 100 مىڭنان جيناپ، 4,5 ميلليون تەڭگە كولەمىندە پارا الدى. ديرەكتورلار بولسا، اقشانى اتا- انالاردان جيناۋعا ءماجبۇر بولدى"، - دەدى شپەكبايەۆ. بۇدان بولەك، وتىرىستا قىزىلوردا وبلىسىنىڭ ءبىلىم بەرۋ سالاسىنداعى باقىلاۋ كوميتەتىنىڭ بۇرىنعى باسشىسى رۋسلان چاگاي، قاراعاندى وبلىسى شەت اۋداندىق ءبىلىم بەرۋ ءبولىمىنىڭ جەتەكشىسى بولعان ەربول رىسبەك پەن ساتپايەۆ قالالىق ءبىلىم باسقارماسىنىڭ بۇرىنعى باسشىسى شىنار جاڭاسىلوۆا وسى سالانىڭ «ۇزدىك جەمقورلارى» رەتىندە تانىستىرىلدى.
«ءبىلىم سالاسىنداعى تەكسەرىستەردىڭ ناتيجەسى بويىنشا وتكەن جىلى 46 ادام جاۋاپقا تارتىلسا، وسى جىلدىڭ التى ايىندا ونداي ادامداردىڭ سانى 26 عا جەتتى. ولاردىڭ ىشىندە ماڭعىستاۋ وبلىسى بويىنشا ءبىلىم سالاسىنداعى باقىلاۋ دەپارتامەنتىنىڭ باسشىسى ەسبولات ءومىرزاق قىزمەتىنە ساي ەمەس دەپ تانىلسا، باتىس قازاقستان وبلىسى اقجايىق اۋداندىق ءبىلىم بەرۋ ءبولىمىنىڭ باسشىسى مەرەكە زيناليەۆ جانە مۇعالجار اۋداندىق اۋداندىق ءبىلىم ءبولىمى باسشىسىنىڭ ورىنباسارى قۇلەت امانگەلدى جۇمىستان قۋىلدى"، - دەپ اتاپ كورسەتتى اليك جاتقامباي ۇلى.
وتىرىسقا ق ر ءبىلىم جانە عىلىم ۆيتسە- ءمينيسترى بيبىگۇل اسىلوۆا دا قاتىستى. ونىڭ ايتۋىنشا، بيىلدان باستاپ مەكتەپتەردىڭ اتتەستاتسياسى تولىعىمەن توقتاتىلدى. سەبەبى ءدال وسى سالادا جەمقورلىق ارەكەتتەرى كوپ بولعان. "نەگىزى، جوسپارلى اتتەستاتسيانى زاڭنان مۇلدەم الىپ تاستايتىن شىعارمىز. ارىز- شاعىمدار بويىنشا باقىلاۋ شارالارى عانا قالادى. ال ءبىلىم سالاسىنداعى باقىلاۋ دەپارتامەنتتەرىنىڭ قىزمەتى وزگەرەتىن بولادى. ولار ايماقتاردا ءبىلىم بەرۋدى دامىتۋعا كومەكتەسەدى"، - دەدى اسىلوۆا.
ايتا كەتەيىك، مەملەكەتتىك گرانتتاردى ءبولۋ قۇزىرەتى ۋنيۆەرسيتەتتەردىڭ وزدەرىنە بەرىلگەننەن كەيىن وسى سالادا جەمقورلىق ماسەلەسى ۋشىعىپ كەتتى. الايدا بۇگىندە اكادەميالىق ادىلدىگى جوعارى، ياعني سىبايلاس جەمقورلىقتى بارىنشا ازايتقان جوعارى وقۋ ورىندارى بار.
اۆتور: ارمان اسقاروۆ
