بەتتى كۇن كوزىنەن قالاي قورعاۋ كەرەك؟
ال كەيبىرەۋلەردىڭ بەتى، كەرىسىنشە، قۇرعاق. نۇرى جوق. قۋارىپ، قاشان كورسەڭ ساباعى سەمگەن شوپتەي بوپ تۇرادى. وسىنىڭ سىرى نەدە؟ جالپى، بەت تەرىسىنە قالاي كۇتىم جاساۋ كەرەك؟ وسى جانە باسقا دا سۇراقتاردى ءبىز كوسمەتولوگ ايجان ساعات قىزىنا قويدىق، دەپ جازادى زامانا.
- ايجان حانىم، ادامنىڭ تەرىسى جاس ەرەكشەلىگىنە بايلانىستى قانشاعا بولىنەدى جانە ءار جاستا بەتتى قالاي كۇتكەن دۇرىس؟
- تۋىلعاننان باستاپ تەرىدە ءتۇرلى پروتسەسس جۇرەدى. 13 - 15 جاستاعى وتپەلى كەزەڭدە جاسوسپىرىمدەردىڭ تەرىسى اعزاداعى گورموندىق وزگەرىسكە بايلانىستى وزگەرەدى. بۇل جاستا بەزەۋ مەن بورتپەنىڭ شىعاتىنى سودان. ال 25 جاستان باستاپ تەرىدە قارتايۋدىڭ العاشقى بەلگىلەرى بىلىنەدى. كوز اينالاسىندا ۇساق اجىمدەر پايدا بولادى. 35, 45, 55 جاستا تەرىنىڭ قارتايۋى باستالادى. بەتتەگى نۇر ازايىپ، ءاجىم تۇسەدى.
تەرىنىڭ قارتايىپ، ءوڭ- ءتۇسىن جوعالتۋى نەمەسە جوعالتپاي، جاس كورىنۋى گەنگە بايلانىستى. كەيبىر ادامداردىڭ قولى مەن بەتى، مويىنىنىڭ تەرىسى كارى قويدىڭ شاپ تەرىسى نەمەسە تاۋىقتىڭ اياق تەرىسى سياقتى بولىپ كەتەدى. ول تەرىنىڭ كۇنگە، جەلگە، سۋىققا ءتوزىمسىز بولعاندىعىنان. ءبىز ۇستىمىزگە كيىم كيەمىز عوي. ال بەت پەن مويىننىڭ، قولدىڭ قورعانىس «كيىمى» - كرەم. سوندىقتان كرەمدى دۇرىس تاڭداي ءبىلۋ كەرەك. جازدا كۇننەن قورعايتىن، قىستا سۋىقتان قورعايتىن كرەم جاعىپ ءجۇرۋ قاجەت. بەتتى كۇتۋ ءۇشىن پالەنباي مىڭ تۇراتىن قىمبات كرەم جاعۋ شارت ەمەس. ەڭ باستىسى، كرەم نەدەن جاسالدى، قۇرامىندا حيميالىق قوسپا جوق پا، سەنىڭ تەرىڭە جاعادى ما، جاقپايدى ما، وسىنى بىلگەن ابزال.
- وتپەلى كەزەڭدە بەزەۋ شىعۋى قالىپتى قۇبىلىس دەگەنىمىزبەن، ودان وتكەننەن كەيىن دە بەزەۋدەن قۇتىلا الماي جۇرەتىندەر بولادى. بەزەۋدى قالاي كەتىرەمىز، بەزەۋ شىقپاس ءۇشىن نە ىستەگەن ءجون؟
- بەزەۋ دە جاسقا بايلانىستى شىعادى. ەڭ العاش 13 جاستا بىلىنەدى. كەيبىرەۋلەردە 18 بەن 25 جاستا دا بەزەۋ بولادى. بەزەۋ ماي كلەتكاسى كوپ بەتتە بولادى. مەديتسينالىق تۇرعىدان ايتقاندا، بەزەۋ ماي بەزدەرى كوبەيگەندىكتەن، باۋىردىڭ نە كوكباۋىردىڭ جۇمىسى بۇزىلعاندا شىعادى. بەتىنە بەزەۋ كوپ شىعاتىندار جۇمىرتقادان، قۋىرىلعان تاماقتاردان، مايونەزدەن، ءتاتتى تاعامداردان شەكتەلگەنى دۇرىس. بەزەۋى بار بەتتى كۇنىنە 4 مەزگىل جۋىپ تۇرۋعا تىرىسۋ كەرەك. بەتتىڭ تازا بولۋى 85 پايىز دۇرىس تاماقتانۋعا بايلانىستى. سونىمەن قوسا ۇيقىنىڭ دۇرىس بولماۋى دا بەتكە اسەر ەتەدى.
- جازدا بەتتى كۇن كوزىنەن قالاي قورعاۋعا بولادى؟
- جازدا كۇن كوزىنەن قورعايتىن «SPF 15»، «SPF 20»، «SPF 25» ءنومىرلى كرەمدەردى مىندەتتى تۇردە جاعىپ ءجۇرۋ قاجەت. ونى ءاربىر ەكى ساعاتتا جۋىپ تاستاپ، قايتا جاعىپ تۇرۋ كەرەك. ويتكەنى كۇن نۇرى تەرىنى قارتايتىپ، توتىقتىرىپ جىبەرەدى. ەكىنشىدەن، داق تۇسىرەدى. ال قىستا سۋىقتان قورعاۋ ءۇشىن قۇرامىندا بەلوگى بار، مايلى كرەمدەر جاققان ءجون.
- بەتتى سابىنمەن جۋماۋ كەرەك، سابىن بەتتى قارتايتادى دەگەندى ەستىپ جاتامىز. وسى راس پا؟
- ول راس. مايلى تەرىنى سابىنمەن جۋىپ، بەتتى قۇرعاتۋعا تىرىسۋ كەرەك. ال پروبلەمالى تەرى مەن قۇرعاق تەرىگە سابىن قولدانۋعا بولمايدى. سابىن بەتكە ءاجىم ءتۇسۋىن تەزدەتەدى. پروبلەمالى، قۇرعاق تەرىلەرگە دىمقىلدىق بەرەتىن سۇيىق سابىندار پايدالانعان ابزال. قازىر زامان دامىدى عوي. بەتكە ارنالعان ءارتۇرلى سۇيىق سابىن، گەل، كوبىك، سكراب، ءسۇت دەگەندەر شىقتى. ءبىراق ولاردى قولدانعاندا كوز اينالاسىنا تيگىزبەۋ قاجەت. كوز اينالاسىن ارنايى لوسونمەن سۇرتەدى.
- بەتكە ءاجىم ءتۇسۋىنىڭ الدىن قالاي الامىز سوندا؟
- نەگىزى ءاجىم بەتتى كوپ وپالاعاننان دا تۇسەدى. بەتىنە ساعات سايىن وپا جاعاتىن قىزدار بار. ول دۇرىس ەمەس. ەرتە ءاجىم ءتۇسۋى گەنگە دە بايلانىستى. بەتتى قارتايتپايتىن گيمناستيكامەن اينالىسقان ءجون. ياعني اپتاسىنا ءبىر رەت قارا تەرگە تۇسكەنشە بيلەۋ، باسسەينگە ءتۇسۋ، جۇماسىنا ءبىر رەت مونشاعا بارىپ، دەنەنى بۋعا ۇستاپ، تەرى كلەتكالارىن اشۋ. بەتتى بۋلاۋ ميكروسكوپپەن ارەڭ كورۋگە بولاتىن تەرىدەگى ۇساق تەسىكتەردى اشادى. ەكىنشىدەن، تەرىنىڭ دىمقىلدىعىن ارتتىرادى.
مونشادا بەتتى بۋلاعان سوڭ مىندەتتى تۇردە سۋىق سۋمەن شايعان ابزال. كەشكە ءبىر مەزگىل مينەرالدى سۋ شاشىپ وتىرسا، بەتتى دىمقىلداندىرادى. سونداي- اق مينەرالدى سۋعا ليموننىڭ سۋى مەن ءسۇت قوسىپ بەتكە شاشىپ، ودان شاپالاقتاۋ ادىسىمەن ماسساج جاساعان پايدالى. كۇندەلىكتى جاتار مەزگىلدە مينەرالدى سۋ شاشىپ نەمەسە بەتتى جۋىپ جاتقان دۇرىس. تەرىڭىز جاس كورىنسىن دەسەڭىز، كەشكە قاراي مايلى تاماق جەۋدى ازايتىڭىز. وتە قىزىل، اشى شاي دا اجارىڭىزدى بۇزادى. تاتتىدەن دە ءوزىن شەكتەگەنى دۇرىس. بەتىم تازا بولسىن دەسەڭىز، كۇنىنە 2 ليترگە جۋىق سۋ ءىشىڭىز. كۇندەلىكتى اس قۇرامىندا سۋدىڭ مولشەرى كوپ بولسىن.
- بەتكە كۇندىز دە، جاتار مەزگىلدە دە كرەم جاعىپ جاتامىز. بۇل دۇرىس پا، الدە تەرى تۇندە ءبىر ۋاقىت دەمالۋى كەرەك پە؟
- كەز كەلگەن كرەم تەرىدەگى ۇساق تەسىكتەردى جاۋىپ تاستايدى. تۇندە نەگىزىنەن بەتكە ەشتەڭە جاقپاي، دەمالدىرۋ كەرەك. ءبىراق قۇرعاق تەرىگە كرەم تۇنگى مەزگىلدە دە مىندەتتى تۇردە قاجەت. مۇندايدا اپتاسىنا ءبىر ۋاقىت بەتتى تۇندە دەمالدىرسا بولادى. قۇرعاق تەرىگە بانان مەن بالدى جۇمىرتقانىڭ سارىسىمەن ارالاستىرىپ جاقسا پايدالى. بۇل ماسكانى كۇندەلىكتى ىستەسە دە ارتىقتىق ەتپەيدى. ءتاتتى قاۋىننىڭ قابىعىمەن ءسۇرتۋ بەتتىڭ قۇرعاقتىعىن جويادى. مايلى تەرىگە ليمون مەن جۇمىرتقانىڭ اعىن جاعىپ، قياردىڭ قابىعىمەن سۇرتسە بولادى.
بويجەتكەندەر بەتىنە كۇتىم جاسايدى دا، موينى مەن قولىنا مۇلدە قارامايدى. قاراساڭ، بەتى مەن موينىنىڭ ءوڭى ەكى ءتۇرلى. ول دۇرىس ەمەس. كرەم جاعىپ، ماسكا جاساعاندا مويىن مەن قولدى دا ۇمىتپاۋ كەرەك. كەشكە مويىنعا كرەم جاعىپ، مويىندى 10 مينۋت تومەننەن جوعارى، جوعارىدان تومەن ىسقىلاپ ماسساج جاساعان پايدالى. سوندا مويىن تەرىسى ءوڭىن جوعالتپايدى.
- قازىر بويجەتكەندەردىڭ كوبى بەتىن اي سايىن سالونعا بارىپ تازارتىپ جاتادى. ال ەندى بىرەۋلەر بەتىمدى تازالاتسام، حيميالىق زاتتارمەن ءبۇلدىرىپ، زيان كەلتىرىپ الامىن با دەپ قورقادى. سالونعا بارىپ بەتتى تازالاتقان قانشالىقتى ورىندى؟
- بەتتى تازالاسا بەت تەرىسى بۇلىنەدى دەگەنگە دارىگەر- كوسمەتولوگ رەتىندە كەلىسپەيمىن. سالونعا كەلىپ بەتىن ءومىرى تازالاتىپ كورمەگەن قىز بەن بەتىن ۇنەمى تازالاتىپ تۇراتىن بويجەتكەننىڭ بەتىندە ەداۋىر ايىرماشىلىق بولادى. بۇگىندە مەديتسينا دا، كوسمەتولوگيا دا دامىدى. حيميالىق زاتتارمەن بەتىمدى كۇيدىرەدى دەيتىن قورقىنىش جوق. قازىر سالونداردىڭ ءبارى بەتتى شوپتەردەن جاسالعان كوسمەتيكا ارقىلى تازالايدى. ول بەتتىڭ قان اينالىمىن جاقسارتادى. ەكىنشىدەن، ميكروسكوپپەن عانا كورۋگە بولاتىن تەرى تىنىندەگى قاجەتسىز زاتتاردى الادى. ودان بەت جالتىراپ، سەرگەك كۇيگە ەنەدى.
دەگەنمەن كەيدە قىزداردىڭ قورقاتىنىنداي- اق بار. كەيبىر سالونداردا بەتتەگى داق پەن بەزەۋدى پيلينگپەن كۇيدىرىپ، ادامنىڭ ءبىر قابات تەرىسىن سىلىپ تۇسىرەدى. بۇل - زيان. كۇيدىرگەننەن كەيىن ادامنىڭ بەتى تازا، ادەمى بولىپ جۇرەدى. ال ءبىر ايدان كەيىن داق پەن بەزەۋ قايتا شىعىپ، ءتىپتى كوبەيىپ كەتەدى. ءارى بەزەۋ مەن داقتى الدىرىپ تاستايمىن دەۋ دە بوس اۋرەشىلىك. ول ءۇشىن ىشكى ورگانداردى ەمدەپ، دۇرىس تاماقتانۋدى جولعا قويا ءبىلۋ كەرەك.
