مەملەكەتتى الداپ جۇرگەن كاسىپكەرلەرگە قارسى ارنايى كۋالىكتەر ەنگىزىلەدى

وسىنداي ارەكەتتەرگە قارسى يندۋستريالدىق كۋالىكتەر جۇيەسى ەنگىزىلەدى، دەپ حابارلايدى قازاقپارات ءتىلشىسى.

«اتامەكەن» ۇ ك پ باسقارما ءتوراعاسىنىڭ ورىنباسارى نۇرجان التايەۆتىڭ ايتۋىنشا، وتاندىق كاسىپكەرلەر تاراپىنان وسى ماسەلەگە قاتىستى ارىز-شاعىمدار كوپتەپ تۇسەدى.

سەبەبى «وتاندىق كاسىپورىن» اتىن جامىلعان ونداي كاسىپورىندار يمپورتتىق تاۋارعا «قازاقستاندا جاسالعان» دەگەندى جابىستىرىپ قويادى دا، مەملەكەتتىك جانە كۆازيمەملەكەتتىك ساتىپ الۋلارعا قاتىسىپ جۇرەدى. ءسويتىپ، قىرۋار پايداعا كەنەلەدى.

«ءدال وسى ماسەلەگە شەشىلۋگە جاقىن. قازىرگى كەزدە پارلامەنتتە ءبىر زاڭ جوباسى جاتىر. وندا «يندۋستريالدىق كۋالىك» دەگەن نورما بار. شىنى كەرەك، اتالعان باستاماعا قارسى شىققاندار دا جوق ەمەس. ەندى، ءبىزدىڭ تالقىلاۋلارىمىز ءسال كەيىنگە شەگەرىلدى. سەبەبى دەپۋتاتتار دەمالىسقا شىقتى.

قىركۇيەك ايىنان باستاپ تالقىلاۋ جۇمىستارىن تاعى باستايمىز. مەنىڭشە، جىلدىڭ اياعىنا دەيىن «يندۋستريالدىق كۋالىك» دەگەن نورما زاڭ جۇزىندە قابىلدانادى»، - دەيدى التايەۆ.

ايتا كەتەيىك، بۇگىن استاناعى «كورمە» ورتالىعىندا وتاندىق تاۋار وندىرۋشىلەرىنىڭ «ۇلى دالا ەلى» اتتى كەزەكتى فورۋمنىڭ پلەنارلىق وتىرىسى ءوتتى. فورۋم اياسىندا وتاندىق تاۋارلاردىڭ كورمەسى اشىلدى. وعان 350 كومپانيا قاتىسىپ جاتىر. كورمە اياسىندا شەتەلدىڭ ءىرى ەلەكتروندى ساۋدا پلاتفورمالارى العاش رەت ءوز ستەندتەرىن اشتى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى