باياناۋىلداعى «مولالار القابىنىڭ» قۇپيا سىرى - فوتو
«حان قورىق» جاستار فەستيۆالىنە قاتىسۋشىلار قولا داۋىرىندەگى بىرەگەي تاستارمەن جابىلعان باياناۋىلدىق «مولالار القابىنا» قىزىعۋشىلىق تانىتتى. قازبا جۇمىستارىن قىز- جىگىتتەر تيمۋر سماعۇلوۆ باسشىلىق ەتەتىن ايماقتىق Margulan Сentre ارحەولوگيالىق ورتالىعىمەن بىرلەسىپ وتكىزۋدە، دەپ حابارلايدى pavlodarnews.kz.
- ءبىزدى اندرونوۆ مادەنيەتىنىڭ ەسكەرتكىشتەرى قىزىقتىردى. مۇندا جەرلەۋ ءراسىمى شامامەن ءۇش جارىم مىڭ جىل بۇرىن وتكىزىلگەن. ءبىز اندرونوۆتىقتار جەرلەۋ راسىمىنە ارنايى تاڭداپ العان اۋماقتا ءجۇرمىز. جالپى، بۇرىن دا ولار وسى ايماقتا ءومىر ءسۇرىپ، مال اسىراعان. وكىنىشكە وراي، ۇرىلار قابىردە باعالى زاتتار بار ەكەنىن ءبىلىپ، سول زاماننىڭ وزىندە توناۋ جاساعان. ولاي بولماعاندا، وسى جەردە التىن، كۇمىس پەن قولادان قۇيىلعان اشەكەي- بۇيىمدار تابىلاتىن ەدى، - دەيدى ەكسپەديتسياعا كەلگەن رەسەيلىك تانىمال مامان، دوستويەۆسكي اتىنداعى ومبى مەملەكەتتىك ۋنيۆەرسيتەتىنىڭ وكىلى، تاريح عىلىمدارىنىڭ كانديداتى، ەتنولوگيا، انتروپولوگيا، ارحەولوگيا مەن فيزيولوگيا كافەدراسىنىڭ دوتسەنتى يرينا تولپەكو.
عالىمداردىڭ ايتۋىنشا، قابىردە جاتقانداردىڭ باسىم بولىگى - ايەلدەر. ال، ولاردىڭ ماڭىندا كوبى ءبىر جاسقا تولماعان سابيلەر جەرلەنگەن. نە سەبەپتى؟ ارحەولوگتار وسى جاعدايدىڭ سىرىن اشۋ نيەتىندە. ايتا كەتكەن ءجون، بەس جىل بۇرىن ومبى مەملەكەتتىك ۋنيۆەرسيتەتى مەن پاۆلودار مەملەكەتتىك پەداگوگيكالىق ينستيتۋتى ءوزارا كەلىسىم جاساعان. بىرنەشە جىلدان بەرى Margulan Сentre ورتالىعىمەن بىرگە ستۋدەنتتەر قازبا جۇمىستارىن جۇرگىزىپ كەلەدى. بيىل «تۋعان جەر» باعدارلاماسى اياسىندا باياناۋىل وڭىرىنە ارحەولوگيالىق زەرتتەۋ جاسالۋدا. - مۇنداعا قازبا جۇمىستارى ەكى اي بويى جالعاسۋدا. مولالار مەكەنىن بىرنەشە مىڭ ادام كوردى. ەكسپەديتسيانىڭ باستى ماقساتى - اسپان استىنداعى تاڭعاجايىپ مۇراجايدىڭ نەگىزىن قالاۋ. بۇل ايماق اباتتاندىرىلىپ، كوركەيۋى كەرەك. الداعى ۋاقىتتا وسى ايماققا جولدار جاسالىپ، اقپاراتتىق تاقتالار ىلىنەدى. تورايعىر وزەنىندەگى باياناۋىل ارحەولوگيالىق مۇراجايىندا جوندەۋ جاسالىپ، تابىلعان جادىگەرلەر سوندا جىبەرىلەدى، - دەيدى تيمۋر سماعۇلوۆ.
