اقمولالىق ءوز اقشاسىنا ۋالي حان مازارىن اباتتاندىرىپ جاتىر - فوتو
مازار زەرەندى اۋدانىنداعى قازاقستان اۋىلىنىڭ وڭتۇستىك-شىعىس جاق تۇسىندا ورنالاسقان. 2008-جىلى ۋالي حاننىڭ 270-جىلدىعىنا وراي تۇرعىزىلعان. ەسكەرتكىش قىزىل كىرپىشتەن ءتورت بۇرىشتى ەتىپ قالانعان. توبەسىنە جارتى ايى بار كۇمبەز ورنالاستىرىلعان. ەسكەرتكىشتىڭ جالپى اۋماعى 1920 شارشى مەتر، قابىرعالارىنىڭ بيىكتىگى 8 مەتردى قۇرايدى. مۇنداعى ءبىر ەرەكشەلىك ول ۋالي حاننىڭ وزگە قازاق حاندارى سياقتى تۇركىستاندا ەمەس، تۋعان جەرىندە جەرلەنۋى بولىپ وتىر.
بۇل «تۋعان جەر» باعدارلاماسى ارقىلى وبلىستا اباتتاندىرىلىپ جاتقان العاشقى ەسكەرتكىش.
«ەلباسى ماقالاسىندا كوتەرىلگەن قازاقستاننىڭ كيەلى جەرلەرىنىڭ ءتىزىمىن جاساۋ جوباسى قازىرگى كۇنى ەلىمىزدىڭ بارلىق وڭىرلەرىندە قولعا الىنىپ، وسى باعىتتا ناقتى جۇمىستار اتقارىلۋدا. ونىڭ ىشىندە حالىق ءۇشىن كيەلى ورىن بولىپ سانالاتىن جانە ەل تاريحىندا ەلەۋلى ورىن الاتىن جادىگەرلەردى انىقتاپ، سولار جايىندا جان-جاقتى مالىمەتتەر جيناۋ، جۇرتشىلىققا ونى كەڭىنەن تانىستىرۋ بار. ۋالي حاننىڭ مازارىن اباتتاندىرۋ دا سول اۋقىمدى شارالاردىڭ باسى عانا. الداعى ۋاقىتتا وزگە دە تاريحي تۇلعالاردىڭ زيراتىن قالپىنا كەلتىرەتىن بولامىز»، - دەيدى اقمولا وبلىسىنىڭ «تاريحي-مادەني مۇرانى قورعاۋ جانە پايدالانۋ ورتالىعى» م ك م- ءنىڭ ديرەكتوردىڭ مىندەتىن اتقارۋشى قۋانىش شاقشاقوۆ.
ەسكەرتكىشتتىڭ جاڭعىرتۋ جۇمىستارىنا بوريس كوزلوۆ باسقاراتىن «ازيا-اگروحيم» ج ش س دەمەۋشىلىك كومەك رەتىندە 6,5 ميلليون تەڭگە قارجى بولگەن. وعان ەسكەرتكىشتىڭ اۋماعى قورشالىپ، بەدەر تاستار توسەلۋدە. سونىمەن قاتار، حاننىڭ باسىنا ءمىناجات ەتۋشىلەر مەن تۋريستەر ءۇشىن ورىندىقتار ورناتىلىپ، اعاش كوشەتتەرىن وتىرعىزۋ جوسپاردا بار.
