نيكولاس كەيدجدەن كەيىن ءاربىر قوناعىمىزعا تەك شاپان عانا جابامىن - مينيستر ابايەۆ
«نەگىزى، كۇلكىلى فوتولارعا كەيدجدىڭ ەموتسياسى سەبەپ بولعان. ال شاپان جابۋدىڭ ءوزى حالقىمىزدىڭ تاماشا ءبىر ءداستۇرى بولىپ سانالادى. ەندى، نيكولاس كەيدجدىڭ ارقاسىندا وسى ءداستۇرىمىز كەڭىنەن تانىلدى. مەن ءوزىم وعان ريزا بولدىم. ەندى، ءوزىم دە بىزگە، اقپارات جانە كوممۋنيكاتسيالار مينيسترلىگىنە كەلگەن ءاربىر قوناققا تەك شاپان عانا جاباتىن بولامىن»، - دەپ اتاپ كورسەتتى داۋرەن اسكەربەك ۇلى.
ايتا كەتەيىك، جاقىندا استاناعا كەلىپ كەتكەن گولليۆۋد جۇلدىزى نيكولاس كەيدجگە مينيستر ارىستانبەك مۇحامەدي ۇلى شاپان جاپقان بولاتىن. ونىڭ ءدال وسى شاپانمەن تۇسكەن فوتوسى كەڭىنەن تاراپ، كۇلكىلى كوللاجدارعا تۇرتكى بولدى. بارلىعى ونىڭ شاپانىن ەمەس، بەتىندەگى ەموتسياسىن كەلەمەجگە اينالدىردى. ەكى كۇننىڭ ىشىندە گولليۆۋد جۇلدىزىنىڭ كۇلكىگە اينالعان فوتولارىن رەسەي مەن ۋكراينانىڭ بۇقارالىق اقپارات قۇرالدارى دا جاريالادى. ا ق ش- تىڭ باسىلىمدارى دا باسىپ شىعاردى.
اۆتور: ارمان اسقاروۆ
