اقتوبەلىك شەنەۋنىكتەر سىيلىققا العان شاي مەن ىشىمدىكتى مەملەكەتكە تاپسىردى
شاي، قىمبات ىشىمدىك پەن كارتينالاردى العان اقتوبەلىك شەنەۋنىكتەردىڭ سىيلىعى ساتۋعا شىعارىلادى، دەپ حابارلايدى قازاقپارات ءتىلشىسى.
مەملەكەتتىك قىزمەتكەرلەرگە سىيلىق الۋعا تىيىم سالىنعان. جىل باسىنان بەرى اقتوبەلىك قىزمەتكەرلەر 12 زاتتى ق ر قارجى مينيسترلىگى، مەملەكەتتىك مۇلىك جانە جەكەشەلەندىرۋ كوميتەتىنىڭ اقتوبە مەملەكەتتىك مۇلىك جانە جەكەشەلەندىرۋ دەپارتامەنتىنە تاپسىردى.
ولاردىڭ ىشىندە اۆتورلىق كارتينالار، شوكولادتى جەنت پەن شاي بار.
سونىمەن قاتار، «Scottish Hunter» ىشىمدىگى دە تاپسىرىلعان. قوبىز كادەسىيى، بىرنەشە بانكتىڭ بلاكنوتى مەن شاي ىشۋگە ارنالعان ىدىس-اياق، قوراپتاعى كونفەتتى مەملەكەتتىك قىزمەتكەرلەر دەپارتامەنتكە بەرگەن. ەندى بۇل زاتتاردىڭ ءبارى ساتۋعا شىعارىلادى. «مەملەكەتتىك قىزمەت تۋرالى» زاڭعا سايكەس مەملەكەتتىك قىزمەتكەرلەرگە بەرىلگەن سىيلىق ارنايى قورعا تاپسىرىلۋى ءتيىس. سىيلىقتىڭ ءبارى مەملەكەتتىك مۇلىك جانە جەكەشەلەندىرۋ دەپارتامەنتىنە بەرىلدى. الداعى ۋاقىتتا سىيلىقتار ساتۋعا شىعارىلادى»، - دەدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى وبلىستىق دەپارتامەنتىنىڭ باسپا ءسوز حاتشىسى ماحاببات دارمىشەۆا.
