قازاق تىلىندەگى لاتىن ءالىپبيى جىل سوڭىنان دەيىن دايىن بولادى
بۇل تۋرالى بۇگىن ۇكىمەت ۇيىندە «100 ناقتى قادام» ۇلت جوسپارىنىڭ الەۋمەتتىك جانە ءبىلىم سالالارىندا جۇزەگە اسىرىلۋىنا ارنالعان بريفينگتە ق ر ءبىلىم جانە عىلىم مينيسترى ەرلان ساعاديەۆ ءمالىم ەتتى، دەپ حابارلايدى قازاقپارات.
«بۇل ماڭىزدى جوبا بولعاندىقتان بارىنشا اباي بولۋ قاجەت، قاتەلىكتەرگە بوي الدىرماۋ كەرەك. اعىمداعى جىلى جاسالۋى ءتيىستى ماسەلە - بۇل كوڭىلگە قونىمدى بارلىق ءارىپتى قابىلداۋ. بىرنەشە نۇسقا ازىرلەپ، ونى تالقىلاپ، ءالىپبيدى قابىلداۋ قاجەت. سودان كەيىن لاتىنعا كوشۋ جۇمىستارىنىڭ جوسپارىن ءتۇزۋ كەرەك. بۇل ماسەلە بويىنشا ارنايى كوميسسيا قۇرىلىپ جۇمىس ىستەپ جاتىر»، - دەدى مينيستر ب ا ق وكىلدەرىنىڭ ساۋالىنا وراي.
ايتا كەتەرلىگى، مەملەكەت باسشىسى نۇرسۇلتان نازاربايەۆ 2012-جىلعى جەلتوقسان ايىندا جاريا ەتكەن «قازاقستان-2050» ستراتەگياسىندا 2025-جىلدان باستاپ لاتىن الىپبيىنە كوشۋگە كىرىسۋىمىز كەرەكتىگىن مالىمدەگەن بولاتىن. ودان كەيىن اعىمداعى جىلدىڭ ساۋىرىندە جارىق كورگەن «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا الداعى جىلداردا مىقتاپ قولعا الۋ قاجەت بولاتىن بىرنەشە جوبانىنىڭ ىشىندە قازاق ءتىلىن بىرتىندەپ لاتىن الىپبيىنە كوشىرۋ جۇمىستارىن باستاۋ كەرەكتىگىن كوتەرگەن ەدى.
«2025-جىلعا قاراي ءىس قاعازدارىن، مەرزىمدى باسپا ءسوزدى، وقۋلىقتاردى، ءبارىن دە لاتىن الىپبيىمەن باسىپ شىعارا باستاۋعا ءتيىسپىز. ول كەزەڭ دە تاياپ قالدى، سوندىقتان ءبىز ۋاقىت ۇتتىرماي، بۇل جۇمىستى وسى باستان قولعا الۋىمىز كەرەك. ءبىز وسىناۋ اۋقىمدى جۇمىستى باستاۋعا قاجەتتى دايىندىق جۇمىستارىنا قازىردەن كىرىسەمىز. ۇكىمەت قازاق ءتىلىن لاتىن الىپبيىنە كوشىرۋدىڭ ناقتى كەستەسىن جاساۋى كەرەك»، - دەپ اتاپ وتكەن ەدى ەلباسى.
