الماتى دارىگەرلەرى لايىقتى جالاقىعا قاشان قول جەتەتىنىن كەزدەسۋگە بارعان دەپۋتاتتان سۇرادى
سايلاۋشىلارىمەن كەزدەسۋدە دەپۋتات گ. قاراعۇسوۆا بوستاندىق اۋدانىنداعى ءىرى كلينيكالىق ەمحانا ۇجىمىمەن كەزدەستى. دارىگەرلەر دەپۋتاتقا كوكەيىندە جۇرگەن ساۋالداردى تىكەلەي قويۋعا مۇمكىندىك الدى.
دارىگەرلەردىڭ دەنى لايىقتى جالاقى مەن زەينەتاقى اۋدارىمدارى تۋرالى سۇراقتارىن قويدى. «ءبىزدىڭ ەلدە زەينەتاقى ءۇش دەڭگەيدەن تۇرادى. زەينەتاقىمەن قامسىزداندىرۋ جۇيەسىنىڭ بازالىق، مىندەتتى (ىنتىماقتاس جانە جيناقتىق) جانە ەرىكتى دەڭگەيلەرى بار. زەينەتاقى - ۇنەمى رەتكە كەلتىرىپ وتىراتىن جۇيە. ەگەر دەڭگەي بولماسا، زەينەتاقى كولەمى تومەندەي بەرەدى. قازىر ءبىز مەملەكەتتىڭ ازاماتى رەتىندە كەز كەلگەن ادام الاتىن بازالىق زەينەتاقىنى كوبەيتىپ كەلەمىز. ءبىراق، ەڭ باستىسى - ول جيناق جۇيەسى. دامىعان ەلدەردە كارىلىككە جاس كەزىنەن جيناقتاۋ ارقىلى دايىندالادى»، - دەدى دەپۋتات.
«قازىر ولار جيناقتاۋ جۇيەسىن جەتىلدىرۋدى ويلاستىرىپ جاتىر. مۇنىڭ ايتارلىقتاي جاۋاپكەرشىلىگى بار. مەملەكەتتىك - بازالىق جۇيە بولسا، ادامنىڭ ءوزى جيناقتاۋشى. سوندىقتان ءبىز، زەينەتاقى الىمىن مىندەتتى قىلدىق. سوندىقتان، بۇل جەردە ەشتەڭە وزگەرمەيتىن بولادى. جيناقتاۋ جۇيەسىندە ءسىز قانشالىقتى جينايتىنىڭىزعا بايلانىستى. قانشا جۇمىس جاساعان ەڭبەك ءوتىلىڭىز بۇل جەردە ماڭىزدى ەمەس. سوندىقتان، ەڭبەك وتىلىنە قارايتىن ابىرويلى زەينەتاقى جۇيەسى بىرتىندەپ كەتىپ بارادى»، دەدى ول.
ەلىمىزدە مىندەتتى مەديتسينالىق ساقتاندىرۋ جۇيەسى جۇزەگە اسىرىلعالى جاتىر. دارىگەرلەر دەپۋتاتتان بۇل رەفورمانىڭ جالاقىعا قالاي اسەر ەتەتىنىن سۇرادى. «مەديتسينالىق ساقتاندىرۋدىڭ ەڭ ءبىر وڭتايلى جاعى ساپا دەڭگەيىن كوتەرىپ قانا قويماي، بىلىكتى دارىگەرلەردىڭ دە ەڭبەگىن لايىقتى باعالايدى. ونىڭ مەحانيزمدەرى ءالى دە جەتىلدىرۋ ساتىسىندا. الايدا، وزگە ەلدەردىڭ تاجىريبەسىنە سۇيەنە وتىرىپ، ايتاتىن بولساق، بىلىكتى دارىگەرلەر بۇل جۇيەدە جاقسى جالاقىعا قول جەتكىزەتىن بولادى. بۇل ءوز قولدارىڭىزدا. ارنايى ماماندار عانا ەمەس، مەدبيكەلەر دە مەدساقتاندىرۋدىڭ پايداسىن كورەتىن بولادى، تەك سانيتارلىق قىزمەتكەرلەردە عانا وزگە كەستە بولادى»، - دەدى دەپۋتات.
اۆتور: الماس مۇقاش ۇلى
