جوعالعان سپورتشى قىزبەن بىرگە بولعان جاس جىگىت قۇزدان قۇلاپ، مەرت بولدى
«جاس جىگىتتىڭ مۇردەسى تابىلدى. مۇردەدە كۇشتەپ ءولتىرۋدىڭ بەلگىلەرى بىلىنبەيدى. فاكتىگە قاتىستى سوت-مەديتسينالىق ساراپتاما تاعايىندالدى. سونىمەن قاتار، ونىڭ كۇدىكتى رەتىندە ىزدەۋدە بولعانى انىقتالدى. ول ءوزىنىڭ تۋىسقاندارىنىڭ ءبىرىن پىشاقتاپ، ءىرى سوماداعى اقشاسىن الىپ كەتكەن»، - دەيدى الماتى قالالىق ءى ءى د رەسمي وكىلى سالتانات ازىربەك.
ايتا كەتەيىك، وسىدان بىرنەشە كۇن بۇرىن ىزدەۋ جاريالانعان سپورتشى قىز اناستاسيا سميرنوۆانىڭ مەدەۋ شاتقالىنان نازار ەسىمدى جىگىتپەن تابىلعانى حابارلانعان ەدى. الايدا، ىزدەۋگە كومەكتەسكەن ەرىكتىلەردەن قاشامىز دەپ اناستاسيا مەن نازار قۇزدان قۇلاپ كەتكەن بولاتىن. يسلام ۋگۋشەۆ ەسىمدى ۆولونتەر فەيسبۋك الەۋمەتتىك جەلىسىندە نازاردىڭ شاتقالدان قۇلاپ، مەرت بولعانىن حابارلادى.
ەسكە سالا كەتەيىك، بۇعان دەيىن الماتى دارىگەرلەرى ءوزىن ىزدەگەندەردەن قاشىپ قۇزدان ۇشىپ كەتكەن سپورتشى قىزدىڭ حال-جاعدايى تۋرالى ايتىپ بەرگەن. سپورتشى قىز اناستاسيا سميرنوۆا جەدەل مەديتسينالىق كومەك كورسەتۋ اۋرۋحاناسىنا جەتكىزىلگەن.
«بويجەتكەننىڭ تىزە تۇسىنىڭ جۇمساق تىندەرى، كوكىرەك قۋىسى زاقىمدالعان. اۋرۋحانانىڭ قابىلداۋ بولىمشەسىندە قاجەتتى ماماندار كومەك كورسەتتى. تەكسەرۋ جۇرگىزىلدى. دەنساۋلىعىنا قاۋىپ تۋىپ تۇرعان جوق»، - دەگەن بولاتىن قالالىق دەنساۋلىق ساقتاۋ باسقارماسى.
اۆتور: الماس مۇقاش ۇلى
