وسكەمەندە تاعدىر تالكەگىنە ۇشىراعان ايەلگە پاتەر بەرىلدى
وسكەمەن قالاسى تۇرعىندارىنىڭ كوبى ونىڭ اۋىر تاعدىرىنان حاباردار. كوزى كورمەيتىن زامزاگۇل تاستاپ كەتكەن ەسكى ۇيدە ستۋدەنت قىزى جانە مۇگەدەك ۇلىمەن بىرگە تۇردى. بىلتىرعى جىلدىڭ ماۋسىم ايىندا ۇلى ءىز-ءتۇسسىز جوعالىپ، ءالى كۇنگە دەيىن ونىڭ تاعدىرى بەيمالىم كۇيدە قالىپ وتىر.
زامزاگۇل ينسۋلت الىپ، جۇرەگىنە وتا دا جاسالدى. تاياۋدا عانا ول تۇرمىس جاعدايىن جەڭىلدەتۋگە كومەك سۇراپ، قالا اكىمى قۋات تۇمابايەۆتىڭ قابىلداۋىنا كەلدى. «بىرنەشە ساعات بۇرىن زامزاگۇل قۇسايىنوۆا اكىمدىك ەسەبىنەن جوندەۋ جۇمىستارى جۇرگىزىلگەن پاتەرگە كوشىرىلدى. ەندى ول تۇرعىن ءۇي كەزەگىندەگى مەملەكەتتەن بولىنەتىن پاتەرىن العانشا قىزىمەن وسى پاتەردە تۇرادى. پاتەردىڭ تەرەزەلەرى سىرلانىپ، جاڭا لينولەۋم توسەلىپ، تۇسقاعازدار جابىستىرىلدى. ءۇي جيھازدارى مەن تۇرمىستىق تەحنيكالار ساتىلىپ الىندى»، - دەدى اكىمدىكتىڭ باسپا ءسوز قىزمەتى.
جايلى ۇيگە كوشىرىلگەن ايەل قۋانىشتان جىلاپ جىبەردى. ونىڭ ايتۋىنشا، ەندىگى ارمانى ۇلىن تاۋىپ، جاڭا پاتەرگە الىپ كەلۋ.
