گولليۆۋد فيلمدەرىنەن باس تارتۋعا بولادى - قىرعىز رەجيسسەرى

 بۇگىن قازاقستان، گرۋزيا، قىرعىزستان مەن وزبەكستاننىڭ كينەماتوگرافيستەرى باس قوسىپ، ا ق ش- تىڭ فيلمدەرىنە قاراي بەرمەي، كينوپروكاتتى وزدىگىمەن دامىتۋ ماسەلەلەرىن تالقىلادى، دەپ حابارلايدى قازاقپارات ءتىلشىسى.

«ءبىر جىلى ءبىز گولليۆۋد فيلمدەرىنەن مۇلدەم باس تارتتىق. مەن «ماناس» كينوتەاترىندا شەتەلدىك كينونى مۇلدەم كورسەتپەسىن دەپ بۇيرىق شىعاردىم. سونىڭ ارقاسىندا وتاندىق فيلمدەرگە سۇرانىس ارتتى، ادامداردىڭ سانى دا كوپ بولدى. قىرعىزدىڭ جاقسى فيلمدەرىنە ۇزاق ۋاقىت بويى جوعارى سۇرانىس بولدى. ماسەلەن، «انانى ىزدەۋ جولىندا» فيلمى قازاقستاندا دا جاقسى كورسەتىلدى»، - دەيدى سادىق شەر- نياز.

رەجيسسەردىڭ ويىنشا، «ەۋرازيا» كينوفەستيۆالى ارقىلى ت م د ەلدەرىنىڭ فيلمدەرىن كەڭىنەن كورسەتىپ، جەرگىلىكتى نارىقتى بارىنشا قورعاۋعا بولادى. جيىننىڭ مودەراتورى باۋىرجان شۇكەنوۆ تە بۇرىنعى ءداستۇردىڭ دە، بايلانىستاردىڭ دا ۇزىلگەنىنە باسا نازار اۋدارىپ، كورشى ەلدەردىڭ كينو سالاسىنداعى ىنتىماقتاستىعىن دامىتۋ قاجەتتىگىن جەتكىزدى.

«شىنى كەرەك، قازىرگى كەزدە ءبىز ا ق ش، رەسەي، ۋكراينا جانە تاعى باسقا ەلدەردىڭ كينو جاڭالىقتارىن جاقسى بىلەمىز دە، كورشى مەملەكەتتەردە نە بولىپ جاتقانىن بىلمەيمىز. سول سەبەپتى بۇگىنگى جيىندى وتكىزگەندى ءجون كوردىك. بالكىم، ءبىر مەموراندۋمدى راسىمدەيمىز، ءيا بولماسا، كينوالياسقا بىرىگەمىز. بىزگە قاۋىمداستىقتى دا قۇرۋعا بولادى. سونىڭ ارقاسىندا ارىپتەستىك بايلانىستاردى دامىتۋعا مۇمكىندىك بار»، - دەپ اتاپ كورسەتتى ب. شۇكەنوۆ.

 اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى