اينۇر تۇرسىنبايەۆا وتىرىپ قالعان قىزدارعا ورىنسىز سۇراق قويماۋعا شاقىردى
ول ونسىز دا جانى جارالى ادامدارعا ارتىق سۇراق قويىپ، «بۋىنسىز جەرىنەن پىشاق» ۇرماۋعا شاقىردى.
بۇل تۋرالى Stan.kz حابارلايدى.
نازارلارىڭىزعا تۇرسىنبايەۆانىڭ جازباسىن تولىق نۇسقادا ۇسىنامىز.
«جاقىندا ءبىر پوست وقىدىم... ورىسشا... ادامنىڭ جۇرەگىن اۋىرتاتىن سۇراقتار جايلى... شىندىعىندا ادامعا سۇراق قويعاندا ويلانبايدى ەكەنبىز عوي. مىسالى باسى بوس تۋىسىمىزدى نەمەسە تانىسىمىزدى كورە قالساق «نەگە ۇيلەنبەيسىڭ» دەپ باس سالامىز. قىز بالا بولسا ءتىپتى جامان. «ءاي، نەعىپ ءجۇرسىڭ، كۇيەۋگە تيمەيسىڭ بە» دەپ تۇرتكىلەي جونەلەمىز. اۋىر ما؟ اۋىر. قىزداردىڭ جاسى 25 تەن اسقاندا وزدەرى دە جالعىزدىقتان دەپرەسسياعا كىرە باستايدى، جانە ول كەلىن بولۋدان قاشىپ ءجۇر دەپ كىم ايتتى سىزگە؟! قالاۋىنداعى جىگىت كەزدەسىپ، الامىن دەپ تۇرسا ەسى دۇرىس قىز باس تارتا ما؟! ادام بولماسا بىرەۋدىڭ ۇيىنە ءوزى بارىپ كىرىپ الا ما؟! وسىمەن قالىپ كەتەمىن بە دەگەن ۇرەي دە جۇرگەن ادامدى ودان سايىن تىعىرىققا تىرەپ تاستايمىز.
ۇيىندە وتىرىپ قالعان قىزى بار تانىسىمىزعا دا تىنىشتىق جوق. «قىزىڭ نەعىپ وتىر؟!»، «ۇيلەنەتىن ويى بار ما؟!» پەرزەنتىنىڭ ءوز باقىتىن تاپقانىن قاي انا قالامايدى قۇداي-اۋ؟! انا جۇرەگىنە اۋىر ما؟! اۋىر.
مەن كوپ پەرزەنتىم بولسا دەپ كوپ ارماندادىم. قارالماعان جەرىم جوق! ءبىر جەرگە بارسام «وسى سەن نەگە تاعى تۋىپ المايسىڭ» دەپ سۇراماسا ەكەن دەپ وتىراتىنمىن. اسىرەسە كوپشىلىك جەردە. جۇرەگىمە ءبىز تىعىپ العانداي اسەر ەتەتىن. ال پەرزەنت سۇيە الماي جۇرگەن قانشاما ادام بار. كورىپ قالساق باس سالامىز. «نەعىپ تۋماي ءجۇرسىڭ؟! «،» جاس كەزىڭدە تۋىپ الساڭشى»، «قاشان بارامىز شىلدەحاناعا؟ «بالا كۇتۋدىڭ قانشالىقتى قيىن ەكەنىن جاقسى تۇسىنەم... جانىڭ جابىعىپ جۇرگەندە وسىنداي سۇراقتار ودان سايىن ەزىپ جىبەرەدى-اق. اسىرەسە جۇرتتىڭ كوزىنشە...
كۇيەۋى ىشەتىن ايەلگە دە مازا جوق. «قوي دەپ ايتساڭشى«،» ەمدەتپەيسىڭ بە»... بالا- شاعاسى تاستاپ كەتسە دە سول... «بالالارىڭ كەتىپ قالعان با»، «كەلىنىڭ كەپ تۇرا ما»... باسپاناسى جوق بولسا دا پالە...«نەگە ءۇي المايسىڭدار»، «قاشانعى ءۇيسىز جۇرەسىڭدەر...» ادام جەتىسكەننەن ءۇيسىز جۇرە مە، كوكەم-اۋ؟! جەتپەيدى عوي جەتپەيدى!
«نەگە ارىقتاپ كەتكەنسىڭ»، «نەگە سەمىرىپ العانسىڭ»... اۋىر... وتە اۋىر... نەگە جۇرتتىڭ ءومىرى قىزىق؟! نە شارۋامىز بار؟! ال بىلدىك ال جاۋاپتى. ەستىدىك! باقىتتى بوپ كەتتىك پە؟ راحاتتانىپ قالدىق پا؟ قىزىق پا ەكەن؟! الەۋمەتتىك جەلىدە دە سول. كوپ سۇراققا جاۋاپ بەرۋ اۋىر. ادامنىڭ كوڭىلىنە قاراۋ دا مادەنيەتتىلىكتىڭ، يماندىلىقتىڭ بەلگىسى! كوڭىلگە قاراپ سويلەپ ۇيرەنە بىلەيىك»، - دەيدى اينۇر تۇرسىنبايەۆا.
