ەشكىمنەن جەڭىلمەگەن كاسىپقوي بوكسشىلار - فوتو
ۇزاق جىلدار بويى ۇزدىكتەر كوشىن روككي مارچيانو باستاپ تۇرعان ەدى. وتكەن عاسىردىڭ ەلۋىنشى جىلدارى شارشى الاڭدى ارمانسىز شايقاعان ا ق ش- تىڭ ورەنى 49 كەزدەسۋدىڭ بارلىعىندا جەڭىسكە جەتتى.
2015-جىلدىڭ 12- قىركۇيەگىندە روككيدىڭ كورسەتكىشىن ءوزىنىڭ وتانداسى فلويد مەيۆەزەر قايتالادى. ونىڭ دا رەكوردى - 49 جەڭىس! ەندى فلويد ۇستىمىزدەگى جىلدىڭ 26- تامىزىندا يرلانديالىق كونور ماكگرەگورمەن جۇدىرىقتاسادى. ەگەر وسى باسەكەدە مەيۆەزەردىڭ مەرەيى ۇستەم بولسا، وندا ول «التىن تاققا» كوتەرىلەدى. بۇل كۇندەرى سان ميلليون جانكۇيەر وسى تاريحي ءساتتىڭ كۋاسى بولۋعا ايرىقشا قۇشتارلىق تانىتۋدا.
الايدا بۇل جالعاندا ماڭگىلىك ەشنارسە جوق. كوز ارباعان بيىكتەرگە كوز تىككەن ساڭلاقتاردىڭ قول قۋسىراپ وتىرماعاندارى ايان. ولاردىڭ سىرتىندا جالىنداپ ءوسىپ كەلە جاتقان جاستار بۋىنىنىڭ وكىلدەرى بار. ەرتە مە، كەش پە، سولاردىڭ ءبىرى وسى رەكوردتاردى بۇزىلاتىنى انىق. بۇگىنگى ماقالامىزدا ءبىز كاسىپقوي رينگتە 30 دان اسا جەكپە-جەك وتكىزسە دە، جەڭىلىستىڭ كەرمەك ءدامىن تاتىپ كورمەگەن اتاقتى بوكسشىلار جايىندا اڭگىمەلەۋدى قۇپ كورىپ وتىرمىز. سونىمەن بۇگىنگى تاڭدا باستى باسەكەلەستەرىن باس كوتەرتپەي ۇتىپ، قارسى كەلگەندەردى قوعاداي جاپىرىپ جۇرگەن دۇلەي كۇش يەلەرى كىمدەر؟
داڭقى جەر جارعان روككي مارچيانو مەن فلويد مەيۆەزەردىڭ كورسەتكىشىن قايتالاۋى مۇمكىن جۇدىرىعى گۇرزى جىگىتتەر اراسىنان ۆاەنحونگ مەنايوتيننىڭ (47,6 كەلى) ەسىمى ەرەكشە اتالۋدا. 31 جاستاعى تايلاند بوكسشىسىنىڭ كاسىپقويلارمەن ايقاسىپ جۇرگەنىنە 10 جىلدان استى. سول ارالىقتا 47 رەت رينگكە 47 رەت كوتەرىلىپ، بارلىعىندا باسىمدىق تانىتتى. 17 باسەكەنى مەرزىمىنەن بۇرىن اياقتادى. بۇگىنگى تاڭدا WBC نۇسقاسى بويىنشا الەم چەمپيونى اتانىپ وتىرعان ول جۇمىر جەردەگى ەڭ جەڭىل سالماقتا باق سىنايتىن جىگىتتەردىڭ بارلىعىن سوققىعا جىقتى.
الىپتارمەن ايقاسىپ جۇرگەن دەونتەي ۋايلدەردىڭ (90,7+ كەلى) دە داڭقى دۇركىرەپ تۇر. ونىڭ دا جاسى 31 دە. 2008-جىلى بەيجىڭ وليمپياداسىندا جارتىلاي فينالعا دەيىن جەتىپ، قولا مەدالدى قورجىنعا سالعاننان سوڭ ول كاسىپقوي رينگتى جاعالادى.
بۇل رەتتە دە اسىعى الشىسىنان ءتۇستى. بويى 2 مەتردەن اساتىن ا ق ش بوكسشىسى 38 كەزدەسۋدىڭ بارلىعىندا جەڭىسكە جەتىپ، 37 قارسىلاسىن ەسىنەن تاندىردى. ءار جىلدارى ۋايلدەر كەلۆين پرايس، ودلي حارريسون، سەرگەي لياحوۆيچ، كريس اررەولا سىندى مىقتىلاردى وڭدىرماي سابادى.
ول - WBC نۇسقاسىنىڭ چەمپيونى جانە WBA نۇسقاسىنىڭ سۋپەرچەمپيونى! راسىندا دا دەونتەيدىڭ بۇل تابىسىنا تاڭدانباۋ دا، تامسانباۋ دا مۇمكىن ەمەس. ءبىراق سوعان قاراماستان ايتۋلى بوكسشىنى اسا اۋىر سالماق دارەجەسىنىڭ تەڭدەسسىزى دەپ ايتا المايمىز. ويتكەنى، الىپتاردىڭ سالماعىنداعى باسقا دا نۇسقالار بويىنشا التىن بەلبەۋدى يەلەنىپ وتىرعان ەنتوني دجوشۋا (19 جەڭىس، 19 نوكاۋت) مەن دجوزەف پاركەر (23 جەڭىس، 18 نوكاۋت) دە ءالى ەشكىمنەن جەڭىلىپ كورمەگەن.
قازاقستاننىڭ ماقتانىشى، ورتا سالماق دارەجەسىندە ءۇش بەلدى نۇسقا بويىنشا الەم چەمپيونى اتانىپ وتىرعان گەننادي گولوۆكيندى (72,6 كەلى) قالاي ماقتاساق تا جاراسادى. 35 جاستاعى قاراعاندىنىڭ ورەنى 2006-جىلدان بەرى كاسىپقوي رينگتە ءوز ءناپاقاسىن تاۋىپ ءجۇر. 37 قارسىلاسىن قوعاداي جاپىرعان ول 33 باسەكەنى مەرزىمىنەن بۇرىن اياقتادى. وسىعان دەيىن ول قارسىلاس شىداتپاي كەلسە، ۇستىمىزدەگى جىلدىڭ 18- مامىرىندا امەريكالىق دەنيەل دجەيكوسپەن بولعان جەكپە-جەك 12 راۋندقا سوزىلدى. ەندى كۇزدە GGG مەكسيكانىڭ مارقاسقاسى ساۋل الۆارەسپەن جۇدىرىقتاسادى. بۇل باسەكەنى جانكۇيەرلەردىڭ تاعاتسىزدانا كۇتىپ جۇرگەنىنە تالاي جىلدىڭ ءجۇزى بولدى.
36 كەزدەسۋدىڭ بارلىعىندا باسىمدىق تانىتقان ميگەل انحەل گارسيا (61,2 كەلى) 30 قارسىلاسىن نوكاۋتقا جىبەردى. بيىلعى جىلدىڭ جەلتوقسان ايىندا 30 جاسقا تولعالى وتىرعان امەريكالىق سپورتشى كەزىندە بەرنابە كونسەپسون، ماۋريسيو پاسترانا، ورلاندو ساليدو، حۋان مانۋەل لوپەس، ەليو روحاس، رومان مارتينەس جانە دەيان زلاتيچانين سىندى سەركەلەرگە سان سوقتىرعان.
ءبىرىنشى ورتا سالماقتاعى حيلبەرتو راميرەس (76,2 كەلى) جايىندا دا جۇرت جاقسى پىكىردە. 26 جاستاعى مەكسيكانىڭ مىقتىسى ريچارد گۋتتەرەس، گيەۆورگ حاچيكيان، ماكسيم ۆلاسوۆ، ارتۋر ابراحام، ماكسيم بۋرساك جانە تاعى باسقا تاجىريبەلى بوكسشىلارعا تىزە بۇكتىردى. 35 كەزدەسۋدەن ول 25 رەت ايقىن باسىمدىققا يە بولدى.
33 جاستاعى تەرري فلەناگاننىڭ (61,2 كەلى) كاسىپقوي بوكستى تاڭداعانىنا سەگىز جىلدان استى. 33 كەزدەسۋدە ۇستەمدىك تانىتىپ، 13 قارسىلاسىن نوكاۋتقا جىبەردى. ۇلى بريتانيانىڭ مانچەستەر قالاسىنىڭ تۋماسى نەيت كەمپبەلل، حوسە سەپەدا، ديەگو ماگدالەنو، دەرري مەتيۋز، پەتر پەتروۆ، ورلاندو كرۋستى قاپى قالدىردى. ەندى جانكۇيەرلەر تەرريدىڭ امەريكالىق ميگەل انحەل گارسيامەن جەكپە-جەگىن تاعاتسىزدانا كۇتۋدە. ەگەر قوس ءدۇلدىل كۇش سىناساتىن بولسا، وندا جەڭىل سالماقتاعى تەڭدەسسىز بوكسشى كىم ەكەنىنە ناقتى جاۋاپ الاتىنىمىز انىق.
سوڭعى جەكپە-جەكتەرىندە رەسەيلىك سەرگەي كوۆالەۆتى قاتارىنان ەكى رەت ۇتقان اندرە ۋوردتىڭ بەدەلى تىپتەن شارىقتاپ كەتتى. 33 جاستاعى ا ق ش- تىڭ اپايتوسى جارتىلاي اۋىر سالماق دارەجەسىندە ءۇش بەلدى نۇسقا بويىنشا چەمپيوندىق اتاقتى ەنشىلەۋدە. كوۆالەۆتان بولەك، ول ەديسون ميراندا، اللان گرين، ارتۋر ابراحام، كارل فروچ، چەد دوۋسون، ەدۆين رودريگەس، پول سميت، سالليۆان باررەرا، الەكساندەر بارندتى ساباعان. بارلىعى 32 رەت جەڭىس تويىن تويلاعان ۋورد سول باسەكەلەردىڭ تەڭ جارىسىندا ءوز قارسىلاستارىن ەسىنەن تاندىردى.
ءبىرىنشى ورتا سالماقتاعى تەرەنس كروۋفورد (63,5 كەلى) 31 رەت شارشى الاعا كوتەرىلىپ، بارلىعىندا باسىمدىق تانىتتى. 22 رەت قارسىلاستارىن نوكاۋتقا جىبەردى. ءار جىلدارى ول برەيديس پرەسكوتت، ريكي بەرنس، يۋريوركيس گامباو، توماس ديۋلورمە، دەرري جان، ۆيكتور پوستول، فەليكس دياس، دجۋليۋس يوندونگونى جەڭدى.
مىنە، جوعارىدا ءبىز 30 دان اسا جەكپە-جەك وتكىزىپ، بارلىعىندا جەڭىسكە جەتكەن الەم چەمپيوندارى جايىندا عانا اڭگىمەلەدىك. ونىڭ سىرتىندا التىن بەلبەۋگە قولدارى جەتپەي جۇرگەن تالاي ساڭلاقتاردىڭ بارىن دا ەستەن شىعارمايىق. ولاردىڭ اراسىندا دا جەڭىلىستىڭ كەرمەك ءدامىن تاتىپ كورمەگەن قىراندار جەتەرلىك. مىسالى، قازاقستاندا گەننادي گولوۆكيننەن بولەك، قانات يسلام مەن جانقوش تۇراروۆتىڭ دا قارقىنى وتە كۇشتى. 32 جاستاعى قانات 24 كەزدەسۋدىڭ 21 ءىن ايقىن باسىمدىقپەن اياقتادى. 26 جاستاعى جانقوشتىڭ قاتارىنان 21 باسەكەدە باق جۇلدىزى جاندى. ەگەر قوس قانداسىمىز وسى باعىتىنان جاڭىلماسا، كەلەشەكتە ولاردىڭ دا چەمپيوندىق اتاق ءۇشىن تالاسۋى ابدەن مۇمكىن.
ەگەر جەڭىلمەگەن كۇيى بىلعارى قولعاپتارىن شەگەگە ىلگەن بوكسشىلار جايىندا اڭگىمەلەيتىن بولساق، ەڭ ءبىرىنشى كەزەكتە، روككي مارچيانو مەن فلويد مەيۆەزەردىڭ ەسىمدەرى ويعا ورالادى. جوعارىدا ەسىمدەرى اتالعان ا ق ش- تىڭ قوس ساڭلاعىنىڭ وزگە ورەندەرگە قاراعاندا شوقتىعى الدەقايدا بيىك ەكەنى ەش داۋ تۋعىزباسا كەرەك.
سونداي-اق سپورتتىق كارەرالارىندا ەشكىمگە ەسە جىبەرمەگەن بوكسشىلار قاتارىندا دجو كالزاگە (1993-2008-جىلدار ارالىعى. 46 جەڭىس، 32 نوكاۋت)، سۆەن وتتكە (1997-2004-جىلدار ارالىعى. 34 جەڭىس، 6 نوكاۋت) گارري سايمون (1994-2016-جىلدار ارالىعى. 30 جەڭىس، 22 نوكاۋت) ميحاي لەۋ (1991-1998-جىلدار ارالىعى. 28 جەڭىس، 10 نوكاۋت)، ەدۆين ۆالەرو (2002-2010-جىلدار ارالىعى. 27 جەڭىس، 27 نوكاۋت) پيچيت سيتبانپراچان (1988-1994-جىلدار ارالىعى. 24 جەڭىس، 18 نوكاۋت) سىندى جۋان جۇدىرىقتى جىگىتتەر بار.
عالىم سۇلەيمەن
aikyn.kz
