تانىمال سپورتشى اناستاسيا سميرنوۆا جوعالىپ كەتتى
سەمسەرلەسۋدەن سپورت شەبەرىنە كانديدات اناستاسيا سميرنوۆا دوسىمەن كەزدەسۋدەن سوڭ ۇيىنە ورالماعان. قىزدىڭ اناسى ەكاتەرينا سميرنوۆانىڭ ايتۋىنشا، 23 -شىلدە جەكسەنبى كۇنى بويجەتكەن كەشكى ساعات 8:00 دەر شاماسىندا ۇيىنەن شىعىپ كەتكەن. اناسىنا ءبىر دوسىمەن كەزدەسەتىنىن ايتقان.
«كەزدەسىپ كەلەمىن دەدى. دوسى بولار دەپ ۇندەمەدىم. كوشەنى ارالاپ كەلەر دەپ. ءبىر ۋاقىتتا كەش بولىپ كەتكەن سوڭ تەلەفون سوعا باستادىم. تەلەفوندارى ءوشىپ تۇر. ەكەۋى دە حابارسىز. سودان پوليتسياعا حابارلاستىق. جىگىتتىڭ اكەسى كەلىپ، ولار دا ىزدەپ جاتىر»، - دەدى اناسى.
اناسىنىڭ ايتۋىنشا، سوڭعى ۋاقىتتا قىزىنىڭ مىنەز-قۇلقىنان ەشقانداي وزگەرىس بايقاماعان. «شىمبۇلاقتا تۇسكەن سۋرەتىن جاريالاپتى ينستاگرامعا. ءبىراز ۋاقىتتان سوڭ ءوشىرىپ تاستادى. ول الگى بالامەن قاشىپ كەتۋى دە مۇمكىن. ءبىراق ەركىنەن تىس الىپ كەتۋى دە عاجاپ ەمەس قوي»، - دەدى اناسى.
پوليتسيا قىزمەتكەرلەرىنىڭ جۇرگىزگەن ىزدەستىرۋ جۇمىستارىنىڭ ناتيجەسىندە اناستاسيانىڭ تەلەفونىنىڭ IMEI كودى ارقىلى سوڭعى رەت سايران اۆتوبەكەتىندە بولعانى انىقتالعان. قىزدىڭ جاقىندارى ولاردى كورگەندەر بولسا حابارلاسۋىن ءوتىندى.
اۆتور: گۇلميرا عوسمان-ءالي
