استانادا شىعىس قازاقستاننىڭ «ەتنواۋىل» ۇلتتىق-مادەني كەشەنى ۇسىنىلدى - فوتو
ەتنواۋىل شىعىس قازاقستان شەبەرلەرىنىڭ قولونەر بۇيىمدارىمەن تولتىرىلىپ، ساندىك قولدانبالى ونەر شەبەرلەرىنىڭ قولدارىنان شىققان كيىز، تەرى، اعاش بۇيىمدارى ەلوردا جۇرتشىلىعىنىڭ تاڭدانىسىن تۋعىزدى.
سونىمەن قاتار، كورمە تۇسىندە كىلەم توقۋ ونەرى، قۇراق قۇراۋ، شي ءورۋ جانە كيىز باسۋدان شەبەرلىك سىنىپتارى ۇيىمداستىرىلدى. ءدال وسى الاڭدا وڭىردەگى ونەر مايتالماندارىنىڭ قاتىسۋىمەن امىرە قاشاۋبايەۆ اتىنداعى فيلارمونيا ارتىستەرىنىڭ تەاترلاندىرىلعان قويىلىمدارى كورسەتىلدى.
ەتنيكالىق اتموسفەراعا ۇلتتىق سپورت تۇرلەرى دە ءوڭ بەردى. شىعىسقازاقستاندىقتار كوكپار، توعىزقۇمالاق، اۋدارىسپاق، قىز قۋۋ، اسىق اتۋ، قازاق كۇرەسى، تەڭگە ءىلۋ، جامبى اتۋ سىندى كوشپەندىلەردىڭ كونە ويىندارىنا وزدەرىنىڭ ەپتىلىگىن كورسەتتى.
مۇندا اۋدارىسپاق بويىنشا قازاقستاننىڭ بەس دۇركىن چەمپيونى ەرمەك جاپيشەۆ، قازاقشا كۇرەس بويىنشا قازاقستان چەمپيونى ەرزات ارعىنوۆ، ءادىل توكەشوۆ، فارحات قايىربەكوۆ جانە ايبەك اعىبايەۆتار ونەر كورسەتتى.
ۇلتتىق سپورت تۇرلەرىن كورسەتۋ ماقساتىندا وبلىستان استاناعا ارنايى دايىندالعان 30 اتى اكەلىندى. 
ال، وتكەن دەمالىس كۇندەرى استانا جۇرتشىلىعىنىڭ نازارىنا «اتا بابالار مۇراسى» دەگەن اتپەن ارحەولوگيالىق جادىگەرلەر كورمەسى ۇسىنىلعان بولاتىن. شىعىسقازاقستاندىقتار كورمەگە قازاقستاننىڭ بەلگىلى عالىمدارى - زەينوللا ساماشەۆ، ابدەش تولەبايەۆ، كارل بايپاقوۆتىڭ سوڭعى ەكى جىلداعى ەڭبەكتەرىن اكەلدى.
ولاردىڭ بارلىعى وبلىستىق بيۋدجەتتەن 2 جىلدا 200 ميلليون تەڭگە بولىنگەن ءۇشجىلدىق ارحەولوگيالىق باعدارلاما اياسىندا جۇمىس ىستەيدى. ۇيىمداستىرۋشىلار ش ق و كۇندەرىنىڭ ەڭ مازمۇندى تۇسى - استانادا بىرنەشە كۇن بويى وتكىزىلىپ جاتقان «رودنوي زەملي - منوگوگولوسە» فوتوكورمەسى ەكەندىگىن ايتادى.
بۇعان دەيىن حابارلانعانداي، 25 -شىلدە كۇنى «ەكسپو-2017» كورمەسى اۋماعىنداعى «امفيتەاتردا» شىعىس قازاقستان وبلىسىنان شىققان بەلگىلى ەستارادا جۇلدىزدارىنىڭ قاتىسۋىمەن «نۇرلى شىعىستان - نۇرلى الەمگە نۇر شاشۋ» اتتى گالا-كونسەرت وتكىزىلەدى. ولاردىڭ قاتارىندا قازاقستاننىڭ حالىق ءارتىسى روزا رىمبايەۆا دا بار.
