امەريكالىق كوۆبويدىڭ استاناداعى كوكپارعا دايىندالعان ۆيدەوسى جاريالاندى - كەسكىن
«امەريكالىق كوۆبويلارعا كوكپار ويىنى ۇنادى. ولاردىڭ ويىننان اسەر العانى سونشالىق، قازاقستانعا كەلىپ، قازاق جىگىتتەرىمەن تاجىريبە الماسپاقشى بولىپ شەشتى. ولار استانادا وتەتىن ويىنعا وسىلاي جاتتىعۋدا»، - دەپ جازدى ا ق ش ەلشىلىگى.
بۇدان بۇرىن حابارلانعانداي، ا ق ش تاريحىندا العاش رەت كوكپار كومانداسى استاناعا كەلەدى. ەلىشىلىكتىڭ باسپا ءسوز قىزمەتكەرى رەن ەلحاي جارىستى تامىزدا وتكىزۋ جوسپارلانعانىن ايتتى. «كوماندا وتكەن جىلى قىرعىزستاندا وتكەن حالىقارالىق كوشپەندىلەر ويىنى الدىندا قۇرىلعان. ولار وندا العاش رەت كوكپارعا قاتىسىپ، قازاقستان كومانداسىمەن جارىسقا تۇسكەن. ولارعا ويىن قاتتى ۇنادى، سوندىقتان ودان ءارى جالعاستىرۋدى شەشتى. كوۆبويلار كوپتەن بەرى ات سپورتىمەن اينالىسادى. EXPO اياسىندا كوكپار بويىنشا تۋرنير وتەدى»، - دەپ حابارلادى رەن ەلحاي. ۇيىمداستىرۋشىلار مۋزىكانتتارمەن كوۆبويلىق اتموسفەرا قالىپتاستىرۋعا ۋادە بەرۋدە.
