جانىبەك ءالىمحان ۇلى: كاسىپقوي بوكسقا ءبىرجولا اۋىسپايمىن
بۇگىن بوكسشىنىڭ وزىنە ارنايى قوڭىراۋ شالىپ، جارىسقا دايىندىعى جايىندا قىسقاشا سۇحبات العان ەدىك.
- جانىبەك، كوپتەن بەرى شارشى الاڭنان كورىنبەي كەتتىڭىز...
- ءيا، ريو وليمپياداسىنان كەيىن قىسقا ۋاقىت دەمالدىق. ودان كەيىن ەل بىرىنشىلىگى ءوتتى. وندا جاڭا سالماقتا سىنعا ءتۇسىپ ەل چەمپيونى اتاندىم. ودان كەيىن 29- قازان كۇنى الماتىدا قانات يسلام مەن گانالىق بوكسشى پاتريك اللوتەيدىڭ جەكپە-جەگى اياسىندا العاشقى كاسىپقوي رينگتەگى سايىسىمدى وتكىزدىم. ودان كەيىن دەنساۋلىعىما بايلانىستى ەم-دوم قابىلداپ، دەمالىس الدىم.
- 9- قىركۇيەك كۇنى تاعى دا قانات يسلامنىڭ ايقاسىنىڭ اندەركارتىندا ونەر كورسەتەدى دەپ ەستىپ جاتىرمىز...
- اللا قالاسا، سول كۇنى ەكىنشى رەت كاسىپقوي بوكستاعى ايقاسىمدى وتكىزسەم دەپ جوسپارلاپ ءجۇرمىن.
- قارسىلاسىڭىز كىم بولادى؟
- ازىرگە ءالى بەلگىسىز. كىممەن، قاي ەلدىڭ بوكسشىسىمەن جۇدىرىقتاساتىنىم جاقىن كۇندەرى بەلگىلى بولماق.
- بەلگىسىز قارسىلاسقا دايىندىعىڭىز قالاي؟
- وتە جاقسى دايىندىقتامىن. كىممەن بولسا دا شىعۋعا ءازىرمىن. قازىر الماتىدا الاتاۋ بوكتەرىندەگى بوكس بازاسىندا جاتتىعىپ جاتىرمىن.
- سوندا ءبىرجولا كاسىپقوي بوكسقا اۋىسىپ جاتىرسىز با؟
- جوق، ءبىرجولا كەتىپ جاتقان جوقپىن. ءالى ۇلتتىق قۇراما ساپىندامىن. اۋەسقويدا ءجۇرىپ، كاسىپقوي بوكس ارقىلى تاجىريبە جيناۋعا بولادى عوي. بۇل مەن ءۇشىن الداعى ۇلكەن سىندارعا ساباق الاتىن مۇمكىندىك. سونىمەن قاتار، ەكسپو اياسىندا وتەتىن ۇلكەن دودادا ونەر كورسەتۋ ۇلكەن مارتەبە. ءبىز وسى ارقىلى قازاق جىگىتتەرىنىڭ قانداي ەكەنىن الەمگە پاش ەتەمىز.
- اڭگىمەڭىزگە راحمەت! ساتتىلىك جولداس بولسىن!
اۆتور: كۇنسۇلتان وتارباي
