الاياقتىقتى كاسىپ ەتىپ كەلگەن قىزىلوردالىق قولعا ءتۇستى
اتالعان ازاماتتىڭ ۇستىنەن قىزىلوردا قالاسىنىڭ 11 تۇرعىنى شاعىمدانعان. ول بىرىنە جۇرگىزۋشى كۋالىگىن جاساتىپ بەرەتىنىن ايتسا، ەندى بىرىنە جۇمىسقا تۇرعىزۋعا، ارزان باعاعا جەر نەمەسە اۆتوكولىك تاۋىپ بەرۋگە، كولىكتى تەز ارادا تىركەۋدەن شىعارىپ بەرۋگە ۋادە ەتىپ، اقشالارىن الىپ، ءىزىن سۋىتىپ وتىرعان.
ازاماتتارعا كەلتىرىلگەن جالپى شىعىن كولەمى 1 ميلليون 611 مىڭ تەڭگەنى قۇراعان. ءىرى كولەمدەگى شىعىندى ازامات س. ا. -عا كەلتىرگەن. 2016-جىلى ونىڭ «Mitsubishi Galant» ماركالى اۆتوكولىگىن ساتىپ الماق بولىپ ۋادەلەسەدى. «اناما كورسەتىپ كەلەيىن» دەگەن جەلەۋمەن وقيعا ورنىنان بوي تاسالاپ، قۇنى 720000 تەڭگە تۇراتىن بىرەۋدىڭ مۇلكىن زاڭسىز يەمدەنگەن.
قازىرگى تاڭدا اتالعان ازاماتتىڭ ۇستىنەن قازاقستان رەسپۋبليكاسى قىلمىستىق كودەكسىنىڭ 190-بابى 2-بولىگىنىڭ 2-تارماعى نەگىزىندە قىلمىستىق ءىس قوزعالىپ، سوتقا دەيىنگى تەرگەپ-تەكسەرۋ امالدارى جۇرگىزىلۋدە. ونىڭ الاياقتىق ارەكەتىنەن زارداپ شەككەن باسقا دا قالا تۇرعىندارىنىڭ جەكە باسى انىقتالۋدا.
ەگەر دە ونىڭ كىناسى تولىق دالەلدەنسە، وندا مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءۇش جىلعا دەيىنگى مەرزىمگە ايىرا وتىرىپ ءتورت مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا، نە سول مولشەردە تۇزەۋ جۇمىستارىنا، نە ءتورت جىلعا دەيىنگى مەرزىمگە باس بوستاندىعىن شەكتەۋگە، نە سول مەرزىمگە باس بوستاندىعىنان ايىرۋعا جازالانادى.
ايتا كەتەرلىك جايت، بۇل قىلمىستاردىڭ تىركەلۋىنە تۇرعىنداردىڭ نەمەسە جابىرلەنۋشىلەردىڭ الەۋمەتتىك جاعدايلارىن تۇزەپ بەرۋگە، اتاپ ايتقاندا، جۇمىسقا ورنالاسۋ، مەملەكەتتىك جاردەماقىلاردى تاعايىنداۋ، جەڭىلدەتىلگەن پايىزبەن نەسيە الىپ بەرۋ، جەر نەمەسە پاتەر الۋ جۇمىستارىنا كومەكتەسۋگە ۋادە ەتكەن ازاماتتاردىڭ سوزىنە الدانىپ، وڭاي جولمەن ءوز جۇمىستارىن بىتىرۋگە تالپىنۋلارى سەبەپ بولىپ وتىر.
