قاراعاندى قالالىق جەر قاتىناستارى ءبولىمىنىڭ باسشىسى تۇتقىندالدى
سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ قاراعاندى وبلىسى بويىنشا دەپارتامەنتىنىڭ تەرگەۋ-جەدەل توبى سوت سانكسياسىمەن سابىرجان داۋىتبەرگەنوۆتى ەكى ايعا قاماۋعا الدى.
«جاسالعان قىلمىستىڭ ءمان-جايى بىزگە بەلگىسىز. سوت بۇلتارتپاۋ شاراسىن سانكسيالاعان كەزدە دالەلدەمەلەرگە باعالاۋ جۇرگىزگەن جوق جانە ولارعا تالداۋ جاساعان جوق. سابىرجان داۋىتبەرگەنوۆ قىلمىستىق كودەكستىڭ 366-بابىندا («لاۋازىمدى تۇلعانىڭ پارا الۋى») كورسەتىلگەن قىلمىستى جاسادى دەگەن كۇدىكپەن ەكى اي مەرزىمگە قاماۋعا الىندى»، - دەپ حابارلادى سوتتان.
بۇعان دەيىن اكىمشىلىك سوت داۋىتبەرگەنوۆتى دۇڭگىرشەكتەردىڭ يەلەرىمەن جەر ۋچاسكەلەرىن جالعا الۋ تۋرالى كەلىسىمشارتتاردى جاساسۋ جونىندەگى سوت شەشىمىن ورىنداماعانى ءۇشىن ايىپپۇل تولەۋگە مىندەتتەگەن بولاتىن.
بۇل پروتسەستەرگە داۋىتبەرگەنوۆتىڭ ءوزى، نە بولماسا باسقارىپ وتىرعان ءبولىمىنىڭ زاڭگەرلەرى كەلمەدى. وسىعان وراي سوت مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ ادەپ جونىندەگى كەڭەسىنە حات جولداعان بولاتىن.
ادەپ جونىندەگى كەڭەستىڭ وتىرىسىندا شەنەۋنىك سوتتاردى جاعالاپ جۇرەتىن ۋاقىتى جوقتىعىن مالىمدەدى. كەڭەس مۇشەلەرى ونى تارتىپتىك جاۋاپكەرشىلىككە تارتپادى.
