كەلەسى جىلى لاۋازىمى تومەن قىزمەتكەر ءوزىنىڭ باسشىسىنان كوپ جالاقى الۋى مۇمكىن

ەلباسىنىڭ «100 ناقتى قادام» ۇلت جوسپارىندا كورسەتىلگەن باسىم باعىتتاردىڭ العاشقىسى وسىنى مەڭزەيدى. بۇل تۋرالى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى ءتوراعاسىنىڭ ورىنباسارى ايگۇل شايىموۆا باسپا ءسوز ءماليحاتىندا حابارلادى.

 ايگۇل شايىموۆا، ق ر م ق ءى س ج ق ا ءتوراعاسىنىڭ ورىنباسارى:

- جاڭا جۇيە ەندىگى جىلدان باستاپ، پيلوتتىق رەجيمدە ەنگىزىلەدى. پيلوتتىق جوبا بويىنشا ءۇش مەملەكەتتىك ورگان وتەدى: مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگى، ادىلەت مينيسترلىگى جانە الماتى وبلىسىنىڭ اكىمدىگى. ولار اپروباتسيا جاساپ، كەمشىلىكتەردى قاراپ، سودان كەيىن ەنگىزىلەتىن بولادى.

 ايگۇل شايىموۆا ەلىمىزدە ءبىلىمدى مەملەكەتتىك قىزمەتكەر كوبەيگەنىن ايتىپ وتىر. ماسەلەن، كاسىبي بىلىكتىلىگىنىڭ ارقاسىندا جوعارى مانساپقا جەتكەن ازاماتتاردىڭ سانى 8 مىڭعا جۋىقتادى. «ىرىكتەۋدىڭ ءۇشىنشى كەزەڭىندە ۇمىتكەرلەردىڭ تاۋەلسىز باقىلاۋشىلاردى تارتۋ مۇمكىندىگى پايدا بولدى»، - دەيدى اگەنتتىك ءتوراعاسىنىڭ ورىنباسارى.

ياعني كانديداتتارمەن سۇحباتتاسۋدىڭ اشىق ءوتۋ بارىسىن دەپۋتاتتار، جۋرناليستەر نەمەسە ۇكىمەتتىك ەمەس ۇيىمداردىڭ وكىلدەرى قاداعالاي الادى. سونداي- اق مۇنداي قىزمەتكە ورنالاسۋعا نيەت بىلدىرگەن ازاماتتار اۋديو جانە بەينەجازبا قولدانۋعا قۇقىلى. بۇگىندە ۇلت جوسپارىنىڭ ءبىرىنشى باعىتىندا كورسەتىلگەن 15 مىندەتتىڭ ون ءبىرى تولىقتاي جۇزەگە استى.

 استون ۋيليام پيتەر، حالىقارالىق ساراپشى:

- «100 ناقتى قادام» قازاقستاننىڭ دامۋىنا وڭ ىقپال ەتەتىنى ءسوزسىز. مەملەكەتتىك قىزمەت بيلىكتىڭ مەيىلىنشە اشىقتىعى، اقپاراتتىڭ قولجەتىمدىلىگى جانە قىزمەتكەرلەردىڭ بىلىكتىلىگىنە نەگىزدەلىپ قۇرىلادى. ۇلت جوسپارىنىڭ العاشقى 15 قادامى وسى ماقساتتى كوزدەيدى. قازاقستاننىڭ ءتيىمدى مەملەكەتتىك اپپاراتى الەمدىك ستاندارتتارعا ساي قالىپتاسادى دەپ سەنەمىن.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى