قازاقستاندىق كيىم ونىمدەرى قىتاي نارىعىنا شىعارىلا باستادى - فوتو
«حانشا» كومپانياسىنىڭ ديرەكتورى ەرىكباي ديداردىڭ ايتۋىنشا، قىتايلىق تۇتىنۋشىلار قازاقستاندىق ديزاينەرلەردىڭ ايەلدەرگە ارنالعان زاماناۋي ۇلگىدەگى كويلەكتەرىنە قىزىعۋشىلىق تانىتىپ وتىر.
«ءبىزدىڭ ونىمدەر بۇل كۇندە قىتايدىڭ ءۇرىمجى قالاسىندا ءىرى ساۋدا ورتالىقتارى جانە شەتەلدىك كيىمدەردى ساتۋمەن اينالىساتىن كومپانيالار ارقىلى قىتاي نارىعىندا ساتىلا باستادى. ءبىزدىڭ بىلۋىمىزشە كيىمدەردىڭ تىگىلۋ ساپاسى جانە تەك بىزگە عانا ءتان ستيلدەگى ديزاينى قىتايلىق تۇتىنۋشىلاردى وزىنە باۋراپ العان»، - دەيدى ديدار.
كومپانيا باسشىسىنىڭ ايتۋىنشا، قىتاي جانە موڭعولياداعى سۇرانىستىڭ كوپ بولۋىنا بايلانىستى ۇلتتىق ونىمدەر ءالى قازاقستان نارىعىنا شىعارىلماعان. «ەلباسىنىڭ شاعىن جانە ورتا كاسىپكەرلىكتى قولداۋى اياسىندا، وتاندىق كيىم ءوندىرىسىن دامىتۋدى جانە شەتەلگە شىعارۋدى ماقسات ەتىپ وتىرمىز. كۇنى كەشە عانا «نۇر وتان» پارتياسىنىڭ استانا قالالىق فيليالىنىڭ قولداۋىندا استاناداعى «كەرۋەن» ساۋدا ويىن-ساۋىق ورتالىعىندا كويلەكتەردىڭ كورسەتىلىمىن وتكىزدىك. وتانداستارىمىزدىڭ وتاندىق كيىمدەرگە ىقىلاسى جوعارى بولدى»، - دەيدى ەرىكباي ديدار.
اۆتور: مۇحتار قاليموللا ۇلى
