پرەزيدەنت جۇلدەسى ءۇشىن بايگە جارىسىنىڭ جەڭىمپازدارى انىقتالدى
شارا اتىراۋ وبلىسىنىڭ كۇندەرى جانە ەكسپو-2017 كورمەسىنىڭ وتۋىنە بايلانىستى ۇيىمداستىرىلدى. شاباندوزدار بايگەنىڭ ءۇش ءتۇرى بويىنشا جارىسقا ءتۇستى: جورعا جارىس، قۇنان بايگە جانە الامان بايگە. ات جارىسىنا قازاقستاننىڭ بارلىق ايماقتارىنان 50 گە جۋىق شاباندوز قاتىستى. بايگەنىڭ جۇلدە قورى دا قوماقتى - 51 ميلليون تەڭگە.
بۇل سىيلىقتى 5 ورىنعا دەيىن ات يەلەرى ءوزارا ءبولىستى. اقشالاي جۇلدەدەن بولەك، جەڭىمپازدارعا اتىراۋ وبلىسىنىڭ اكىمدىگى مەن ۇيىمداستىرۋ كوميتەتىنىڭ ارنايى سىيلىعى تابىستالدى.
سونداي-اق، جامبى اتۋ، قىز قۋۋ، ساداق اتۋ سەكىلدى ۇلتتىق ويىنداردان كورىنىس كورسەتىلىپ، اۋقىمدى مادەني- ويىن- ساۋىق باعدارلاماسى ۇسىنىلدى. الامان بايگەدە الماتىلىق دياس جۇماشتىڭ تۇلپارى 21 شاقىرىمدى سۇرىنبەي باعىندىرىپ، توپ جاردى. ءبىرىنشى ورىن ءۇشىن وعان ۇيىمداستىرۋشىلار 13 ميلليون تەڭگەنىڭ سەرتيفيكاتىن تابىستادى. قۇنان بايگەدە (7 شاقىرىم) مارەگە دىلمۇحامەد جولاۋشىنىڭ ارعىماعى ءبىرىنشى كەلىپ، 7 ميلليون تەڭگەنى قانجىعالادى. جورعالار ىشىندە (5 شاقىرىم) ايحان تولەگەنوۆتىڭ اتى شاشاسىنا شاڭ جۇقتىرمادى. وعان 3 ميلليون تەڭگە تابىستالدى. ء«بىز ءۇشىن بۇل ۇلكەن جەڭىس. وسىعان جەتۋ ءۇشىن كوپ دايىندالدىق. ءبىراق بۇگىن بارلىعى ويداعىداي بولىپ، ارمانىم ورىندالدى. مەنىڭ تۋعاندارىما، اكەمە العىسىم شەكسىز»، - دەپ الامان بايگە جەڭىمپازى دياس جۇماش ءوزىنىڭ قۋانىشىمەن ەلوردا اكىمدىگىنىڭ مەديا ورتالىق تىلشىلەرىمەن ءبولىستى. قاتىسۋشىلاردى جەڭىسىمەن استانا قالاسىنىڭ اكىمى اسەت يسەكەشەۆ، اتىراۋ وبلىسىنىڭ اكىمى نۇرلان نوعايەۆ، مادەنيەت جانە سپورت ءمينيسترى ارىستانبەك مۇحامەدي ۇلى جانە اقپارات جانە كوممۋنيكاتسيالار ءمينيسترى داۋرەن ابايەۆ قۇتتىقتادى.
