قازاقستاندىقتار شەتەلدەن گورى ەل ىشىندە كوبىرەك ساياحاتتاي باستادى
بۇل مالىمدەمە الماتىدا تۋريستىك سالا ماماندارىنىڭ قاتىسۋىمەن وتكەن دوڭگەلەك ۇستەلدە ايتىلدى.
ساراپشىلاردىڭ ايتۋىنشا، بۇعان ەكونوميكالىق جاعداي ىقپال ەتىپ وتىر. Aviata.kz كومپانياسىنىڭ باسشىسى الەكسەي لي 2017 -جىلى ىشكى تۋريزم ترافيگى سىرتقى تۋريزمنەن اسىپ تۇرعانىن جەتكىزدى.
«بۇل تەڭگە كۋرسىنىڭ دوللارعا شاققانداعى باعامىنا بايلانىستى بولىپ تۇر. شەتەلدە دەمالۋ بۇرىنعىدان قىمبات تۇسەدى. ادامدار ەل ىشىندە كوبىرەك ساياحاتتاي باستاعانىن بايقاپ وتىرمىز. وسىنداي ستاتيستيكاعا ەكسپو- نىڭ ءوتىپ جاتقانى دا اسەر ەتسە كەرەك»، - دەدى الەكسەي لي.
Aviata.kz وكىلى استاناعا بارۋشىلاردىڭ سانى تەك ماۋسىمدا كۇرت وسكەنىن ايتتى. ارزان بيلەتتەر تاۋسىلعان سوڭ استاناعا باراتىندار قاتارى ازايىپ قالدى. ال تۋريستىك اقپاراتتىق ورتالىعى اسەل نۇركەبايەۆانىڭ ايتۋىنشا، ءقازىر الاكول پانسيوناتتارىندا دەمالۋشىلارعا ورىن جوق ەكەنىن ايتتى. بۋرابايدا دا بارلىق قوناق ۇيلەر 100 پايىزعا تولى.
«تۇركيادا ءبىر اپتا دەمالۋ ءۇشىن ادام باسىنا 1000 دوللار، 330 مىڭ تەڭگە كەتەدى. ال بۋرابايدا 2 ادامعا 5 كۇن بويى دەمالۋعا وسى سوما كەتەدى. وعان بەسجۇلدىزدى قوناق ءۇي، ءۇش مەزگىل تاماق كىرەدى. قازاقستاندا ىشكى تۋريزمدە اقشا جاساي الاتىن 10-15 كومپانيا بار»، - دەدى اسەل نۇركەبايەۆا.
قازاقستان تۋريستىك قاۋىمداستىعى باسشىسى راشيدا شايكەنوۆا قازاقستاندىقتاردىڭ شەتەلگە شىعۋدى ازايتۋىنىڭ بىرنەشە سەبەبىن اتادى.
«ىشكى تۋريزم دامىپ كەلەدى. ادامدار وتكەن جىلدارى شەتەلدى كورىپ ارالاپ تاستادى. ءبىراق، ءوز ەلىندە كوپ جەردى كورمەگەندەر بار. ءسوز جوق، قارجىلىق فاكتور دا اسەر ەتەدى. ادامدار، ماسەلەن الاكولگە جەتۋ ءۇشىن بارلىعىنا شىداۋعا بار. ويتكەنى، بۇل اناعۇرلىم ارزان ءارى كولدىڭ سۋى كەرەمەت شيپالى»، - دەدى راشيدا شايكەنوۆا.
ونىڭ ايتۋىنشا، بۇگىن مەملەكەت تۋريزمدى دامىتۋعا كوپ كۇش سالىپ وتىر. الايدا، بۇل جەردە مەملەكەت كومەگىنىڭ قاي جەردە ءبىتىپ، بيزنەس جاۋاپكەرشىلىگى باستالاتىنىن ۇعىپ الۋىمىز كەرەك.
«بىزدە جاپپاي تۋريزم جوق. وسىنى ەسكەرە وتىرىپ، مەملەكەت ادامداردىڭ كۋرورتتارعا جەتۋىنە جاعداي جاساۋى كەرەك. ماسەلەن، جولدى جوندەۋ، جەڭىل اۆياتسيا كىرگىزۋ. مىنا تۇرعان كولساي مەن قايىڭدىعا ادامدار قازىرگىدەن دە تەز جەتۋى ءتيىس. سول كەزدە كاسىپكەر اقشاسىنىڭ قايتاتىنىنا سەنىمدى بولىپ، بانكتەن كرەديت الادى»، - دەدى راشيدا شايكەنوۆا.
قاۋىمداستىق وكىلىنىڭ بۇل پىكىرىنە دامۋ كاسىپكەرلىكتى قولداۋ قورىنىڭ وكىلى جاۋاپ بەردى. «تۋريستىك سالانى دامىتۋعا الماتى تۋريزم باعدارلاماسى ىسكە قوسىلدى. كاسىپكەرلەر وسى باعدارلاما ارقىلى ارىپتەس بانكتەر - «حالىك بانك»، «نۇربانك»، «اتف» بانكتەرىنەن نەسيە الا الادى. وسى باعىتتا 400 ميلليون تەڭگە ءبولىندى. كاسىپكەرلەر ەڭ كوبى 100 ميلليون تەڭگە الادى، پايىزدىق مولشەرلەمە 8,5 پايىز. تولەۋ ۋاقىتى 3-7 جىل شاماسىندا. ەڭ باستى شارت كەپىلزات قويۋ»، - دەدى دامۋ وكىلى.
اۆتور: گۇلميرا عوسمانالي
