قىزىن دۋبايعا الىپ كەتكەن اكەسى اناسىنا قايتارماي وتىر
ول قامقورلىق جاساۋ قۇقىعىنان ايىرىلعاننان كەيىن، قىزىن قازاقستاننان الىپ كەتكەن، دەپ حابارلايدى The National باسىلىمى.
سوت قۇجاتتارىنا سايكەس، ولار 2010-جىلى قازاقستاندا وتباسىن قۇرىپ، ءبىر جىلدان كەيىن قىزدارى دۇنيەگە كەلگەن. 2014-جىلى نەكەلەرى بۇزىلىپ، سوت قىزدىڭ اناسىمەن قالۋىنا شەشىم شىعاردى.
اكەسى سوت ۇكىمىنە شاعىم تۇسىرگەنىمەن، جەڭىلىس تاپتى. «مەنىڭ قورعالۋشىم مەن ونىڭ كۇيەۋى ءوز ەلدەرىندە اجىراستى. ولاردىڭ جەرگىلىكتى سوتى قىزدىڭ قامقورلىعىن اناسىنا بەرگەن، الايدا، قىزدىڭ اناسى بالاسىنا اتا-اناسىنىڭ ەكەۋىنىڭ دە تاربيەسى كەرەك دەپ ەسەپتەگەندىكتەن، اكەسىنە قىزىن كورىپ تۇرۋعا، ونىمەن بىرگە ساياحاتتاۋعا رۇقسات بەرىپ، قول قويعان»، - دەيدى ايەلدىڭ قورعاۋشىسى حاسان ەلحايس.
ادۆوكاتتىڭ ايتۋىنشا، اكەسى بەرىلگەن كەلىسىمدى پايدالانىپ، قىزدى 2015-جىلى الىپ كەتكەن، سودان بەرى ول اناسىنا نە كورسەتپەگەن، نە سويلەستىرمەگەن. وسىدان كەيىن اكەسى قىزىن ءوزىنىڭ قامقورلىعىنا ءوتۋىن سۇراپ، بۇرىنعى ايەلىنە قارسى دۋباي سوتىنا تالاپ ارىز جازعان.
«ءبىز مەنىڭ قورعالۋشىم مەن ونىڭ بۇرىنعى كۇيەۋى اراسىنداعى جازبالاردى سوت نازارىنا ۇسىندىق. وندا ايەل كۇيەۋىنەن بالاسىن كورسەتۋىن، تىم بولماسا داۋىسىن ەستىرتۋىن سۇراعان، ال اكەسى قىزىن كورگىسى كەلسە، دۋبايعا ءوزىنىڭ كەلۋىن جازىپ، ايەلدىڭ انالىق سەزىمىمەن «ويناعاندىعىن» بايقاۋعا بولادى. ول جۇكتى بولعاندىقتان دۋبايعا بارا الماعان سوڭ، ءوزىنىڭ اكەسىن جىبەرگەن، ال بۇرىنعى كۇيەۋى اكەسىن ۇزاق كۇتتىرىپ، اقىرى كەزدەسۋگە كەلمەگەن»، - دەدى ادۆوكات.
دۋباي سوتى قورعاۋشىنىڭ دالەلدەرىمەن كەلىسىپ، ءىستىڭ ولاردىڭ قۇزىرەتىندە ەمەستىگىن ايتقان، بۇرىنعى كۇيەۋىنە قىزدى قايتارىپ بەرۋىن بۇيىرعان. ەلحايستىڭ ايتۋىنشا، بۇرىنعى كۇيەۋى قىزدى اناسىنا ءالى قايتارماعان جانە سوت ۇكىمىنە شاعىم بىلدىرگەن.
«ءبىز اپەللياتسيالىق سوتقا قاتىسىپ، قورعالۋشىمىزدى قولدايتىن بولامىز»، - دەيدى ول.
