حان قىلىشى تابىلدى
ول - بولاتتان جاسالعان قىلىش. قىلىشتىڭ ساقتالۋ جاعدايى ورتاشا. سۇيەكتەن جاسالعان تۇتقا- سابىنىڭ تومەنگى بولىكتەرى سىنعان. ءجۇزى ازداپ توتىققان. ءجۇزىنىڭ ءبىر جاعى عانا وتكىرلەنگەن.
قىلىشتىڭ جۇزىندەگى كوپتەگەن كەرتپە ىزدەرى ونىڭ اسكەري قاقتىعىستاردى باستان كەشىرگەندىگىن كورسەتسە كەرەك. دەگەنمەن، قىلىشتىڭ ءجۇزى ءالى دە وتكىرلىگىن جويماعان. قايقىلانعان پىشىندەگى قىلىشتاردى قازاقتا جاتاعان قىلىش دەپ تە اتايدى.
ونىڭ وتكىرلەنگەن جۇزىنە قارسى بەتىنىڭ جارتى تۇتىك ءپىشىندى بولىپ كەلۋى، قىلىشتىڭ اسكەري ارەكەتتەردە قارسىلاستى تەك شابۋ ءۇشىن عانا ەمەس، تۇيرەۋ ماقساتىنا دا ارنالعاندىعىن اڭعارتىپ تۇر.
ءجۇزى مەن سابىنىڭ تۇيىسكەن جەرى جەزبەن كومكەرىلگەن. بۇل قىلىشتى بىرەگەي جادىگەرلەر قاتارىنا جاتقىزۋعا مۇمكىندىك بەرەتىن وزگەشە بەلگىسى بار. ول - قىلىش سابىنىڭ تومەنگى بولىگىندەگى 1798-جىلدان 1809-جىلعا دەيىن قوقان حاندىعىنىڭ حانى بولعان اليم حان نەمەسە بۇحارا امىرلىگىنىڭ سوڭعى بيلەۋشىسى سەيد ءمىر مۇحاممەد اليم حاننىڭ اتى جازىلعان جەكە ءمور بەدەرىنىڭ ءتۇسىرىلۋى بولىپ وتىر.
بۇعان دەيىن حاندار ۇستاعان، تۇتىنعان زاتتار قورىق-مۇراجايدا كەزدەسپەگەن. ⅩⅨ عاسىر مەن ⅩⅩ عاسىردىڭ باسىنداعى قازاق تاريحىنا قاتىستى مالىمەت كوزى سانالاتىن مۇنداي جادىگەرلەر تاريح اقتاڭداقتارىن ايقىنداۋعا سەپ بولار تىڭ جاڭالىقتارعا قول جەتكىزۋگە مۇمكىندىك بەرۋى بەك مۇمكىن.
ونىڭ ۇستىنە مۇنداي بەلگىلى ءبىر تاريحي تۇلعانىڭ ەسىمىنىڭ جادىگەر بەتىندە كەزدەسۋى جادىگەردىڭ ەكسپونات تۇرعىسىنداعى قۇندىلىعىن ارتتىرا تۇسەتىنى بەلگىلى. بولاشاقتا اتالمىش جادىگەرگە عالىمدارىمىز تياناقتى زەرتتەۋ جۇمىستارىن جۇرگىزبەك، دەپ حابارلايدى «ازىرەت سۇلتان» قورىق-مۋزەيىنىڭ باسپا ءسوز قىزمەتى.
