رەسەيلىكتەر نارەستەنى قۇتقارىپ قالعان اقتاۋلىق جولسەرىك تۋرالى فيلم تۇسىرۋدە
رەسەيدەگى «دوماشني» تەلەارناسى ول تۋرالى دەرەكتى فيلم تۇسىرۋدە، دەپ حابارلايدى «قازاقپارات» ح ا ا ءتىلشىسى.
فيلمدى ۆلاديمير كالاشنيكوۆ ءتۇسىرىپ جاتىر. ول «ت م د جولسەرىگى» دەپ اتالادى. فيلم فاتيمانى قۇتقارىپ قالعان التىناي جايلى عانا بولمايدى. بۇرىن حابارلانعانداي، 2017-جىلدىڭ 3- شىلدەسىندە «ماڭعىستاۋ-استراحان» باعىتىنداعى جولاۋشىلار پويىزىنىڭ جولسەرىگى التىناي رامبايەۆا 9 ايلىق فاتيمانىڭ ءومىرىن ساقتاپ قالعان ەدى. وقيعا جولدا بولعان.
ماقات ستانتسياسىندا كۋپەلەردىڭ بىرىندە بالانىڭ ءولىپ قالعانى تۋرالى حابارلايدى. الايدا، جولسەرىك ابىرجىماي، قىزدى قىزمەتتىك بولمەگە الىپ كىرىپ، العاشقى مەديتسينالىق جاردەم كورسەتەدى. 40 مينۋتتان كەيىن ءسابي ەسىن جيىپ، دەم الىپ، جىلاي باستاعان.
فاتيمانىڭ اناسى ارايلىم جاليەۆا بولعان وقيعانى كەرەمەت ءتىرىلتۋ بولدى دەپ ەسەپتەيدى.
ايتا كەتكەن ءجون، ارايلىم دا فيلمنىڭ كەيىپكەرى بولىپ، پويىزدا بولعان وقيعانى تاعى دا باياندادى. وپەراتورلار التىنايدىڭ رەيسكە كەتىپ بارا جاتقانىن، قىزدارىنىڭ شىعارىپ سالىپ جاتقان ەپيزودتارىن ءتۇسىرىپ تە قويعان.
ونىڭ 25 جاستاعى قىزى گۇلزيرا اناسىنىڭ سۇيىكتى تاماعىن ەسكە الىپ، اناسىن قالاي كۇتىپ الاتىنىن، ول ءۇشىن الاڭدايتىنى تۋرالى ايتىپ بەردى.
«ول ماعان جاي عانا انا ەمەس، ول مەنىڭ ءارى قۇربىم، كەڭەسشىم. كەز كەلگەن جاعدايدا كومەكتەسىپ، اقىلىن ايتىپ، جول كورسەتىپ وتىرادى. ول، ءتىپتى تانىمايتىن ادامدارىنا دا مەيىرىممەن قارايدى»، - دەدى گۇلزيرا.
بۇگىن، 21- شىلدە كۇنى ماڭعىشلاق ستانتسياسىندا التىنايدى كۇتىپ الۋ ەپيزودى تۇسىرىلەدى.
التىناي رامبايەۆا ءوزى قۇتقارىپ قالعان فاتيمانىڭ ەكىنشى اناسى اتاندى، ول ءبۇلدىرشىندى قىزىم دەپ اتايدى. ەكى وتباسى دا دوستاسىپ كەتتى. 27- قىركۇيەكتە فاتيما ءوزىنىڭ ءبىرىنشى تۋعان كۇنىن اتاپ وتەدى. ونىڭ تۋعان كۇنىن تەك تۋىستارى عانا ەمەس، ءۇشىنشى قىزىنىڭ ورنىن باسقان التىنايدىڭ وتباسى دا ولارمەن بىرگە تويلايدى.
