قازاقستاندا سوت سانكسياسى ەلەكتروندى تۇردە بەرىلەدى
بۇل تۋرالى بۇگىن 2017-جىلدىڭ 1- جارتى جىلدىعىندا سوت تورەلىگىن جۇزەگە اسىرۋ قورىتىندىلارىنا ارنالعان رەسپۋبليكا سۋديالارىنىڭ كەڭەيتىلگەن وتىرىسى اياسىندا ب ا ق وكىلدەرىنە سۇحبات بەرگەن ق ر جوعارعى سوتى دەپارتامەنتىنىڭ باسشىسى نۇرسەرىك ءشارىپوۆ ايتتى، دەپ حابارلايدى قازاقپارات.
«شىلدە ايىنىڭ 17 سىنەن باستاپ رەسپۋبليكانىڭ بارلىق ءبىرىنشى ساتىداعى سوتتارىندا ەلەكتروندى سوت بۇيرىعىن ەنگىزدىك. ياعني، سوتقا جۇگىنۋ قاعاز تۇرىندە ەمەس ەلەكتروندى تۇردە بولادى. ماسەلەن، كوممۋنالدىق مەكەمە بەلگىلەنگەن تارتىپپەن ەلەكتروندى تۇردە سوتقا جۇگىنەدى. ءوتىنىش ەلەكتروندى تۇردە تۇسكەننەن كەيىن كەڭسەدە تيىسىنشە تىركەۋدەن ءوتىپ، سۋديانىڭ كومپيۋتەرىنە كەلەدى. سۋديا قاراپ، بۇيرىق شىعاراتىن نەگىز بولسا، ونى ەلەكتروندى تۇردە شىعارىپ قايتادان كەڭسەگە جونەلتەدى. ال كەڭسەدەن ارىزدانۋشىعا ەلەكتروندى تۇردە جىبەرىلەدى. بۇل جەردە ەشقانداي قاعاز اينالىمى بولمايدى»، - دەدى ول.
ونىڭ ايتۋىنشا، ەندىگى ۋاقىتتا جوعارعى سوت ەلەكتروندى سانكسيا بەرۋ ماسەلەسىن قولعا العان. «ءتيىستى ماتەريالدار پروكۋراتۋرادان سوتقا ەلەكتروندى تۇردە تۇسەدى. ونىمەن تانىسقاننان كەيىن ەگەر سانكسيا بەرىلەتىن بولىپ شەشىم قابىلدانسا، سانكسيا ءوتىنىش بەرگەن ورگانعا ەلەكتروندى تۇردە جىبەرىلەدى. قازىرگى ۋاقىتتا مۇنى دا ىلكى جوبا رەتىندە ەنگىزدىك. الداعى ۇلكەن ماقساتىمىز ەلەكتروندى سوت ءماجىلىس زالى بولىپ وتىر. قازىرگى ۋاقىتتا ونىڭ جوسپارىن قۇرىپ، تەحنيكالىق جاعىنان قامتاماسىز ەتىپ جاتىرمىز، ال باعدارلاما جاعىنان قامتاماسىز ەتىپ قويدىق. ول «سيفرلىق قازاقستان» باعدارلاماسى اياسىندا جۇزەگە اسىرىلۋدا»، - دەدى ن. ءشارىپوۆ.
دەپارتامەنت باسشىسىنىڭ ايتۋىنشا، اتالعان جوبا اياسىندا سۋديانىڭ، سوتقا قاتىسۋشى ادۆوكات پەن پروكۋروردىڭ الدىندا ءبىر جۇيەگە تىركەلگەن كومپيۋتور بولادى. قارالاتىن ىسكە قاتىستى بارلىق تەرگەۋ ماتەريالدارى مونيتوردان شىعىپ تۇرادى. «بۇل جوبامەن قازىر ءبىز تىڭعىلىقتى اينالىسۋدامىز. جىلدىڭ سوڭىنا دەيىن قوسامىز دەگەن جوسپارىمىز بار»، - دەدى ول.
