مۇسىلمان ءدىنىن قابىلداعان الماتىلىق كارىس قىزى قازاققا كەلىن بولۋدى ارمانداپ ءجۇر - فوتو
بويجەتكەن بوس ۋاقىتىندا قازاقتىڭ سالت-ءداستۇرىن تانىپ ءبىلىپ، ۇلتتىق تاعامدار جاساۋدى ۇيرەنەدى ەكەن.
«مەنىڭ اكەم كارىس بولعانىمەن، مەن ءوزىمدى قازاق سەزىنەمىن. سەبەبى، قازاقستاندا تۋدىم، دوستارىمنىڭ دەرلىك بارلىعى وسى ۇلتتان. نەگە ەكەنىن بىلمەيمىن كىشكەنە كەزىمنەن قازاق تىلىندە سويلەگەندى ۇناتاتىنمىن. قازاق تىلىندە ەركىن سويلەۋ مەن ءۇشىن ماقتانىش. جەرگىلىكتى جۇرت كەيدە مەنى «قازاق قىزى» دەپ ويلاپ قالادى»، - دەپ كۇلەدى روكسانا.
بويجەتكەن قازاق ءتىلىن بىلگەننىڭ پايداسى كوپ ەكەنىن ايتىپ ماقتانىپ قالدى
«قازاقشا سويلەگەنىم ءۇشىن تالاي رەت تاكسي جۇرگىزۋشىلەرى جول اقىسىن المادى. حالىققا قىزمەت كورسەتۋ ورتالىعىنا بارعان سايىن كەزەكتەن تىس قىزمەت كورسەتەدى. ءبارى تانىپ، مەنى كۇلىپ قارسى الادى دەسەم بولادى. ءتىپتى، كەيدە «سۋرەتكە تۇسەيىكشى» دەپ تە سۇرايدى. جالپى قازاق ءتىلىن بىلگەننىڭ پايداسىنان باسقا زيانىن كورمەدىم. مەن مۇنى قالىپتى جاعداي دەپ قابىلدايمىن. باسقا ازاماتتارعا ايتىپ جۇرەمىن «قازاقستاندا تۋىپ، وسى ەلدە ءومىر ءسۇرىپ جاتقاندىقتان، قازاقتىڭ سالت-ءداستۇرىن سىيلاپ، قازاقشا ءبىلۋ كەرەك» دەپ».
اتا-انام مەنى ماقتان تۇتادى
«اكەم ماعان سەنىڭ ۇلتىڭ كارىس، قازاق ەمەسسىڭ دەپ ەشقاشان تۇزەمەگەن. كەرىسىنشە، جان-دۇنيەمدى ءتۇسىنىپ، «مەنىڭ قازاق قىزىم» دەپ ەركەلەتەدى. ءتىپتى، ەل-جۇرتقا مەنى اتا-انام ماقتان تۇتىپ «ءبىزدىڭ روكسانا قازاقشا كەرەمەت سويلەيدى» دەپ ايتىپ جۇرەدى. ال، اجەم مەنى قازاقشالاپ «رايحان» دەپ اتايدى.
«مۇمكىن قازاققا كەلىن بولارمىن»
روكسانا اپتا سايىن باۋىرساق ءپىسىرىپ، ورازا مەن قۇربان ايتقا ارناپ قازاقى داستارحان جايۋدى دا جاقسى بىلەدى. مۇسىلمان ءدىنىن قابىلداعان بويجەتكەن تاقۋا بولماسا دا، ءدىني جورالعىلاردى جاقسى ورىندايمىن دەيدى.
«بەشبارماقتى قازاقتىڭ كەلىندەرىنەن كەم جاسامايمىن. مەن پىسىرگەن باۋىرساقتار وتە ءدامدى بولادى. بارلىعىن عالامتوردان ۇيرەندىم. جالپى ۇلتىڭدى سۇيسەڭ ونىڭ ارتىقشىلىعىن كورىپ، اسىن دايىنداۋ تۇك قيىن ەمەس. كەيدە ءوزىمدى قازاقتىڭ بولاشاق كەلىنى دەپ تە سەزىنەمىن. شىنى كەرەك ماعان ءسوز سالاتىن جىگىتتەردىڭ بارلىعى قازاقتار. سوعان قاراپ كەيدە ويلايمىن، قازاققا كەلىن بولامىن-اۋ دەپ»
22 جاستاعى روكسانا تسوي قالاداعى مەكتەپتىڭ بىرىندە باستاۋىش سىنىپ مۇعالىمى بولىپ جۇمىس جاسايدى. جەكە كاسىبى بار بويجەتكەن ۇستاز بولۋدىڭ باستى سەبەبىن بالالاردى وتە جاقسى كورەتىندىگىمەن تۇسىندىرەدى.
