استانادا قاي جەردە جۇمىسقا ورنالاسۋعا بولادى؟
ۇيىمداستىرۋشىلار - جۇمىسپەن قامتۋ ورتالىعى ماماندارىنىڭ سوزىنشە، مۇنداي شارالاردان كەيىن كەم دەگەندە 100 ادام ەڭبەكپەن قامتىلادى، دەپ حابارلايدى ەلوردا اكىمدىگىنىڭ مەديا ورتالىعى.
وسىمەن جەتىنشى رەت ۇيىمداستىرىلعان جارمەڭكەگە «جاستار» سارايى الدىندا باستالماي جاتىپ، ۇزىن سونار كەزەك قالىپتاستى. جۇمىس ىزدەۋشىلەر قاتارىندا ەندى عانا وقۋىن ءتامامداعان جاس ماماندار مەن ءارتۇرلى سەبەپتەرگە بايلانىستى جۇمىسسىز قالعان ماماندار بار.
ءبىلىم، دەنساۋلىق ساقتاۋ، قۇرىلىس سالالارى، قوناق ءۇي قىزمەتى، اۆتوپارك جانە پوليتسيا 60 قا جۋىق جۇمىس بەرۋشى بارلىعى مىڭعا جۋىق بوس جۇمىس ورىندارىن ۇسىندى.
جۇمىس ىزدەۋشىلەردىڭ ىڭعايلىلىعى ءۇشىن مەكەمە-كاسىپورىندار بوس جۇمىس ورىندارىنىڭ ءتىزىمىن جاساعان. جۇمىس بەرۋشىلەردىڭ قاتارىندا بۇل جولى تەك شاعىن جانە ورتا مەكەمەلەر عانا ەمەس، سونىمەن قاتار قازاقستاندىق نارىقتاعى ءىرى مەكەمە-ۇيىمدار بولدى.
مىسالى، بوس جۇمىس ورىندارى جارمەڭكەسىندە ەكىنشى دەڭگەيلى ءىرى بانكتەردىڭ ءبىرى، الەمدىك اتى بار ءتورت جۇلدىزدى وتەل، سونداي-اق جەرگىلىكتى پوليتسيا قىزمەتى مەن حالىققا قىزمەت كورسەتۋ ورتالىقتارى ماماندار ىزدەستىرۋدە.
جۇمىسپەن قامتۋ ورتالىعىنىڭ مالىمەتىنشە، جىل باسىنەن بەرى وسى كۇنگە دەيىن ەڭبەكپەن قامتۋعا كومەك سۇراپ 9242 ادام وتىنگەن. ونىڭ 6 مىڭى (%62) جۇمىسسىزدىقتان قورعاۋ الەۋمەتتىك شارالارىمەن قامتىلعان. 3547 ادام تۇراقتى جۇمىس ورىندارىنا ورنالاسقان.
