قاتەرلى ىسىككە شالدىققان سۋرەتشى ايەل ءوزىنىڭ ەمىنە اقشا جيناۋ ءۇشىن سۋرەتتەرىن ساتۋعا شىعاردى
بۇل تۋرالى ول فەيسبۋكتەگى پاراقشاسىندا ءبولىستى. 32 جاستاعى ايەلدىڭ ەكى ۇلى بار ەكەن. باقىتتىڭ ايتۋىنشا، قازاقستاندا وعان دياگنوز قويا الماعان. سول سەبەپتى ول وڭتۇستىك كورەيادا ەم قابىلداپ جاتىر.
«سەۋلدە ماعان مۇرىن مەن قۇلاق اراسىنداعى قابىنۋ دەگەن دياگنوز قويدى. جانە يىق مەن مويىندا ليمفالىق تۇيىندەر بار ەكەنىن ايتتى»، - دەيدى سۋرەتشى ايەل.
باقىتتىڭ كورەيادا ەمدەلۋى، جول شىعىنى، ءجۇرىپ-تۇرۋىن ونىڭ تۋىستارى مەن تانىستارى تولەگەن. وسىنىڭ بارلىعى ءۇشىن 10 مىڭ دوللار جۇمسالعان. قازىر ونىڭ ىسىگىن ساۋلە جانە حيمياتەراپيا ارقىلى ەمدەۋدە.
«ونىڭ ميدىڭ قاسىندا ورنالاسقانىنا بايلانىستى، تومموتەراپيا جاساۋعا دا بولادى. جەتى مينۋتتان 33 سەانس. ءبىر سەانستىڭ قۇنى 1700000 ۆون»، - دەپ جازادى ول.
ياعني، تەڭگەگە شاققاندا جالپى 33 سەانستى قابىلداۋ ءۇشىن وعان 16230456 تەڭگە قاجەت. ول سونداي-اق، ايتۋىنگا دارىگەرلەر «راكتىڭ 70 پايىزعا جوعالۋ مۇمكىندىگى بارىن جانە ەشقاشان ورالمايتىنىن» ايتىپتى.
ول ءوزىنىڭ ەمىنە قاجەتتى اقشانى جيناۋ ءۇشىن، سۋرەتتەرىن ساتىلىمعا شىعارعان. «مۇمكىن ءسىز ساتىپ الىپ، مەنىڭ ساۋىعىپ كەتۋىمە كومەكتەسەرسىز»، - دەپ جازادى ول.
«ءسىزدىڭ ماعان قاتتى جانىڭىزدىڭ اشىپ وتىرعانىن سەزەمىن، ءبىراق ەموتسياعا ەرىك بەرمەيىك. بۇل بار بولعانى ءتاننىڭ اۋرۋى. رۋح تۇرعىسىنان مەن ساۋمىن! بارلىعىڭىزعا راحمەت!»، - دەپ جازادى باقىت ءبۇبىحانوۆا.
